roasted leg of lamb

ما صارت عيد !!

طبعاً بداية أشكر كل من سأل عني و أعتذر عن كل إلي ما قدرت أرد عليهم بالفترة إلي طافت.

كل يوم أقول برد بس ببوست مرتب و معتبر لين أنترست كاميرتي من الصور و حضرة المعتبر ليلحين ما طلع للوجود ، بعدين قلت بس خل أحط إلي أحطه مدونتي تكود عليها الغبار من زمان ما فتحتها ، عاد طلع معاي فخذ هالخروف ، خن نقول إن هالبوست ياي بمناسبة العيد إلي طاف إلي صار لي مادري جم شهر أحتفل فيه ، أو العيد إلي إن شاء الله ما بقى شي على ييته ...مادري اختاروا المناسبة إلي تعجبكم.

بالأول إلي يسمع كلمة (فخذ خروف مشوي) يحسبه شي مستحيل بس ترى سهل ما يبيله شي، كلش كلش ما يبيله مجابل و النتيجة رائعة ،يعني مو معقولة اللحم شلون يصير طري ، طريقة الطبخ تعتمد على الـ slow roasting إن اللحم ينحط على درجة حرارة منخفضة لمدة 4 ساعات بالفرن و يتغطى زين بالقصدير ، عاد إنتي بأول ساعتين حطي اللحمة بالفرن بعدين روحي شوفي لج شغلة (روحي استقبال ولادة .. عزا...جمعية...كملي ختمتج .. عجفي شعر بنتج خصلة خصلة بعدين ردي فليه... سوي meditation..) ، لا خلصت الساعتين ردي المطبخ و قلبي اللحمة على الويه الثاني و حطي معاها الخضرة و ردي غطيها مرة ثانية بالقصدير ، بعدين روحي الأفينيوز تمشي شوية و أوقفي بطابور بينك بيري و إخذي لج بينك بيري (طبعاً لا تاكلينه وراج لحم) لما تطوف ساعة و نص ردي البيت وشيلي القصدير عن اللحمة و خليها بالفرن لمدة ربع ساعة (على ما تبدلين هدومج) و بعدين قدميها ...إشرايكم فيني و آنا أخطط لكم يومكم :)

المقادير:

فخذ خروف صغير الحجم (يجب أن يكون ملائماً تماماً لحجم الصينية) يزال عنه الشحم الزائد (مع مراعاة عدم المبالغة في إزالة الشحم حتى لا يفقد اللحم طراوته خصوصاً أننا لن نستخدم أي نوع من الزيوت في التتبيل)

خضار متنوعة حسب الرغبة (حبات بطاطس صغيرة مقطعة إلى أنصاف ، مشروم يترك كاملاً دون تقطيع ، حبات بصل صغيرة الحجم مقطعة إلى أنصاف )

زيت زيتون (كمية كافية لتغطية الخضار)

للتتبيل :

فصوص ثوم مقطعة إلى أنصاف بشكل طولي

أوراق روزميري (إكليل الجبل) طازجة أو من الممكن إختيار أي نوع من الأعشاب العطرية على أن تكون خضراء و ليست مجففة (مثل الزعتر أو النعناع أو الريحان أو الميرامية sage )

مسترد و يفضل النوع الذي يحتوي على حبوب المسترد أو كما يسمى whole grain mustard

maple syrup يباع في الجمعيات تحت إسم شراب القيقب

liquid smoke أو أي بهارات مشكلة خاصة باللحم

الطريقة :

يفضل تتبيل اللحم لمدة ليلة كاملة

- بعد إزالة الشحم ، نغطي اللحم بالمسترد تماماً، ثم نقوم بعمل شقوق صغيرة و عميقة بعض الشيء في أماكن متفرقة من الفخذ.
- نغرس في كل شق فص ثوم و بعض أوراق الروزميري.
-نصب الـmaple syrup على كامل الفخذ ثم نرشه بالبهارات أو بصلصة الـliquid smoke ثم نضعه بالثلاجة لمدة ليلة كاملة.
ملاحظة : لا نستخدم الملح في التتبيل حتى نحافظ قدر الإمكان على السوائل الموجودة في اللحم.
-في اليوم التالي ...نحمي الفرن على درجة حرارة 150 و نغطي صينية اللحم جيداً بالقصدير وندخلها الفرن لمدة ساعتين.
-بعد إنقضاء الساعتين نقوم بقلب اللحم على الوجه الآخر و نضيف الخضار و نصب عليها زيت الزيتون و نتبلها بالملح و الفلفل الأسود و ممكن إضافة بعض أغصان الروزميري و نغطي الصينية بالقصدير مرة ثانية.
- بعد ساعة و نصف نزيل غطاء القصدير عن الصينية و نترك اللحم و الخضار لمدة ربع إلى نصف ساعة إضافيين حتى تتحمر الطبقة العلوية حسب الرغبة.

تصوير :mellow

break

إجازة و نرجع لكم إن شاء الله عقب العيد

عيدكم مبارك :)

كيكة التشوكليت مع البينت بتر ...أول محاولة جادة في تزيين الكيك

مطبخنا بيمشي من عدة الطبخ إلي أشتريهم ، لدرجة إني ما قمت ألقى لي مكان بالمطبخ أحط فيه أغراضي ، صرت أدعس بكل مكان ، حتى دار الإستقبال ما سلمت ...الناس يردون من السفر معاهم سيفونيرات ، هدوم يديدة ، جناط ، مكياج ، طبعاً آنا مو مقصرة بكل هالأشياء بس هم فوقهم أرد بكتب طبخ ، قوالب تارت ، بهارات ،عدة طبخ ... كلهم استخدمتهم إلا عدة تزيين الكيك.

كله أتخيل نفسي أقعد بالساعات أزين كيك و أرسم عليها و ألصق و أقصص ... بس أتخيل ، ولا مرة تجرأت ، مالي خلق أقعد أبربس و بالأخير يطلع شكل الكيكة "كوارثي". عاد ذاك اليوم فجيت اليرارة و قعدت أطالع الفوندان و المزربان و السباتيولاز و أقول لي متى يعني؟

لما آخذ دورة بتزيين الكيك ...في دورة حاطين إسمي على الويتنغ لست و احتمال بيلغونها و في دورة مع بداية السنة اليديدة ... الله بنطر لين شهر واحد؟ بيحزر الفوندان!! إذا على التعليم يوتيوب ما يقصر كل شي فيه...و الحمدلله الله هداني :)

اليوم الأول : making the cake (المقادير في آخر البوست)




قمة الإحباط لما الواحد يشوف كيكة مزينة و شكلها يهبل و عقب ما يقصها و يعفسها تطلع إستغفرالله باصجة و مالها طعم ...الكيكة لازم تكون لذيذة علشان إذا الشكل ما نجح على الأقل بالأخير تنوكل .. إخترت إنها تكون تشوكليت و الفروستينغ من الـpeanutbutter ، أحب الملوحة إلي يعطيها السبال للحلويات ، طبعاً تقدرون تستخدمون خليط الكيك الجاهز من بيتي كروكر أو بيلسبيري أو روبن هود ..إلخ بس لأني أحب الشقى ..سويت الكيكة بنفسي ..


و بما أنها تجربة إستخدمت قالب وايد صغير ، 6 إنش (قمت أعرف بالإنشات).







سوينا الكيك و إنتفخ ، طبعاً لازم نقص الجزء المرتفع من الكيكة ، و نشرب الكيكتين بالتشوكليت سيرب (هيرشي) و نخليها تبرد بدرجة حرارة الغرفة (الكيكة لازم تكون باردة قبل لا نحط عليها الكريمة)






نحشي الكيكة بالفروستينغ إلي سويناه و نحرص إن الجزء الثاني من الكيكة إلي بينحط فوق يكون صوب الناعم مو المقصوص..طبعاً لين مني ممكن تصبون فوقها كاكاو سايح او تحطون فروستينغ زيادة من فوق بس لأني بزين الكيكة فلازم تتغطى كلها

التغطية ما طلعت ناعمة بس في طريقة ممكن تخلي شكل التغطية أنعم




إن نغطي الكيكة بورق مشمع (أو حتى كلينيكس المطبخ المتين) و نمسح بإيدنا على سطح و حواف الكيكة و يكون المسح باتجاه واحد (تخيلوا نفسكم إنكم قاعدين تضربونها أوتي) و لما نشيل الورق أو الكلينكس نشيلهم بنفس إتجاه المسح مو العكس.

هذا ليلحين أنعم سطح كيكة سويته. نحط الكيكة بالثلاجة و نكمل اليوم إلي وراه.


اليوم الثاني : التزيين


المفروض إن قبل لا أبتدي أغطي الكيكة بالفوندان ، أو حتي بالأصل قبل لا أسوي الكيكة ، المفروض إني أسوي الزينة (الورود) بس لأن آنا ما عندي غير علبة فوندان وحدة فما أدري إذا بتكفي حق تغطية الكيكة ولا لأ خليت تشكيل الورد بالأخير إذا بقى شي من عجينة الفوندان.

الفوندان لازم نعجنه بإيدنا لما يلين ، يكون عندنا سطح نظيف نرش عليه سكر بودرة كخطوة تمهيدية علشان نرق الفوندان ، الفوندان لما نرقه نخليه أكبر من حجم الكيكة بوايد


علشان نشيله نلفه على الـrolling pin لين النص و نفرشه على الكيكة و نبتدي نلم العجينة حوالين الكيكة و نمسح بإيدنا على السطح و الحواف علشان ما يصير شكل الفوندان مجعد و علشان يلصق الفوندان بالفروستينغ عدل.



نقص الزايد بقطاعة البيتزا



تمت المهمة بحمد الله ..تغطية الكيكة بالفوندان كانت أكثر خطوة خايفة منها ، طلعت من تحت شوي متنتفة و أماكن ثانية شوي متشقق بس راح يتغطى إن شاء الله...عموماً النتيجة كأول محاولة كانت ممتازة.
الحمدلله إن الفوندان زاد منه علشان اسوي الورد ...نرد نعجن الفوندان و بعدين نرقه ، و نستخدم قطاعات على شكل ورود



كيوت :)


الورد أبي يكون شكله مقوس مو flat لأن الكيكة كلها راح تكون أبيض بأبيض فلازم الزينة تكون بارزة ، التقويس يبيله عدة و قوالب معينة مو موجودة عندي ، بس في طريقة حلوة تعلمتها من النت ، إن ناخذ كلينكس و نسفطه بهالشكل





بعدين نربط الطرفين علشام يتكون لنا شكل حلقة و نحط الورد داخله لما ينشف و ياخذ الشكل



المادة اللاصقة إهيا الرويال آيسينغ royal icing وهو عبارة عن بياض بيضة + كوب و نص سكر بودرة + قفشة صغيرة عصير ليمون أول شي نجرخ (نخفق) بياض البيض شوية مو وايد بعدين نضيف السكر قفشة قفشة للبياض مع الإستمرار بالخفق السريع لما يتكون عندنا مزيج يشبه الكريمة لونه أبيض لامع مثل اللولو ، بعدين نضيف له الليمون ونخلط بالقفشة




نزهب جيس التزيين حق الـpiping و نختار الراس إلي فيه أصغر فتحة و نركبه على الجيس


علشان نملا الجيس بالكريمة (أو بالرويال آيسينغ) لازم أحد يمسك لنا الجيس و يفتح لنا إياه ...إذا ما في أحد يساعدكم ييبوا قلاص طويل و حطوا الجيس داخلة بهالطريقة و نمليه بالوريال آيسينغ

صار الجيس زاهب

الرويال آيسينغ راح نلصق فيه الورد على الكيكة و نرسم فيه الدوائر داخل كل وردة ، ما راعيت الترتيب و آنا أحط الورد خليت شكله طبيعي ، و على السطح خلطت بين أحجام الورود صغيرة و كبيرة و متوسطة

صار عندنا زحمة ورد

و نرسم بالرويال آيسينغ خطوط متعرجة على الحواف منها للتزيين و منها علشان نغطي الشقوق ، و إلي بقى من الفوندان نسوي منه دوائر صغيرة نصفها على الحاشية من تحت مثل عقد اللولو و تنلص بالرويال آيسينغ بعد

خلصنا :))

الشغل أسهل مما توقعت و كان متعة ما بعدها متعة

مقادير الكيكة

المكونات الجافة : كوب و نص طحين ، كوب سكر ، ثلث كوب كاكاو بودرة ، ملعقة صغيرة بيكربونات الصودا ، رشة ملح

المكونات السائلة : بيضتين ، 3 ملاعق صغيرة فانيليا سائلة ، علبة ساور كريم ، ملعقة صغيرة خل أبيض ، نص كوب حليب

الطريقة :

- نخلط المكونات الجافة على حدا و المكونات السائلة على حدا

- نصيف خليط المكونات الجافة إلى خليط المكونات السائلة

-نصب الخليط الناتج في قوالب الكيك (القوالب يجب أن تكون مدهونة جيداً بالزيت و مغطاة بالطحين) و ندخلهم في فرن درجة حرارته 150 لمدة ساعة أو إلى يستوي الكيك.

-نخرج الكيك من الفرن و نتركه يبرد داخل القالب لمدة خمس دقائق ثم نخرجه من القوالب و نتركه إلي أن يبرد تماماً بدرجة حرارة الغرف قبل أن نضع الفروستينغ.

مقادير الـpeanutbutter frosting: ( علبة بينت بتر حجم 500 غرام - نص قالب زبدة لينة - كوبين و نص سكر بودرة- حليب حسب الحاجة

-نخلط السكر + الزبدة إلى أن يتكون لدينا عجينة مفتتة

-نضيف البينت بتر إلي الخليط السابق و نخفق الجميع بالمضرب الكهربائي

- إذا كان الخليط جامد نضيف له القليل من الحليب حتى يلين

- يستخدم الخليط لحشو الكيكة أو تغطيتها.

تصوير : mellow

يوم من عمري

ما يختلفون أثنين على ان أكبر جزء من يومنا نقضيه في مكاتبنا مع زملائنا في العمل ، و إن الايام و الأسابيع و الاشهر و السنين تركض ، بس عقارب ساعاتنا بالدوام ما تمشي !! لكن مجرد محاولات تفعيل النشاطات الإجتماعية بين الموظفين يمكنها أن تضفي نوع من الحميمية إلي من شأنها إنها تكسر طوق الملل و الرتابة إلي يلف "الدوام" ...علشان جذي دايماً ما ننتهز آنا و زميلاتي الفرص و نتصيد المناسبات علشان نحتفل فيها "بالمكتب" ، وسبحان الله ساعتها الوقت يركض و حتى لو إيينا الشغل فجأة نسويه بنفس حلوة، و أكثر المناسبات إلي نحتفل فيها إهيا أعياد ميلادنا.

أوائل شهر 11 تعتبر من اسعد الايام بالنسبة لـ"جميلتنا" نورة و كلنا بالقسم نعرف هالشي ، فهو غير إن يتصادف فيه يوم ميلادها ، تحتفل فيه بعد بعيد ميلاد ولدها ، و ذكرى زواجها ، فمن يدخل شهر 11 نتزهب آنا و باجي زميلاتي بالقسم ، خطط و مساسر و مسجات و شفرات كل هذا علشان "المفاجأة" إلي اظنتي نورة عقب 3 سنين من إشتغلت معانا صارت تتوقعها.

بس هالسنة غير ، مادري إشفينا خذانا الشغل و نسينا لا نحتفل ،و نورة بعد خذت إجازة يوم عيد ميلادها و اليومين إلي وراه ، المهم إن يوم الاربعا إلي طاف تذكرنا و قررنا إن نحتفل اليوم إلي وراه "الخميس" خاصة إن في زميلات من أقسام ثانية بيسوون ريوق على سلامة وحدة من الموظفات كانت توها طالعة من المستشفى ، فقلنا ننتهز الفرصة دام البنات متيمعين نييب أحنا كيكة و شموع حق نورة.

منو إييب الكيكة؟

جان انقز

"آنا!!"

red velvet layered cake من نوفمبر بوتيك ، حدها كيوت و بناتية جنها كيكة عرس صغيرة .

طالبتها من قبل ؟

لأ ...بس ما قط مرة مرت علي رد فيلفيت مو لذيذة ، فإن شاء الله مضمونة

إنزين وين شايفتها؟

بالنت (أول مرة كنت شايفتها بمدونة جندل و مرة ثانية يايني إيميل و من يومها و آنا زايغ قلبي عليها إلا بطلبها)

ميلو خلاص نعتمد ...الكيكة عليج؟ لأنها راح تكون طبق الحلو الرئيسي باجي البنات بييبون موالح حق الريوق

إي إن شاء الله ، بس خل أتأكد إذا موجودة ولا لازم اطلبها

و اتصل على نوفمبر بوتيك و آنا بالدوام ، سألتهم اذا في إمكانية إني أطلبها الحين و آخذها نفس اليوم بالليل

قالوا لي يصير ...بس هاااا..ترى أكبر طبقة فيها "القاعدة" 7 ونص إنش ،إذا تبين اكبر من هالحجم لازم تطلبين قبلها بفترة

آنا ما اعرف أقدر الاحجام بالإنش ، بس الكيكة 3 طبقات يعني حتى لو بتطلع شوي صغيرة راح تكون رفيعة فإن شاء الله فيها بركة ...قلت لهم اوكي ... قالوا لي خلاص تيين اليوم تستلمينها بالليل

يوم صارت الساعة 8 بالليل رحت مجمع التلال ...دخلت المحل قلت لهم عن الاوردر...شوي و إييبون لي الكيكة

@@

!!!!!!!

بس؟!!

هذي هي كل الكيكة؟

متأكدين مافي لها تكملها مني مناك؟

مام سوري بس أحنا قلنا لج سبعة ونص إنج قلتي اوكي

أمبييييييييييييييييه.... لأ ...وايد صغيرة...يعني لو أدز لها إياها البيت كـ" نقصة " ولا هدية ميخالف بس مو يمعة موظفات !!!

ما تتخيلون شعوري بهاللحظة ، إفترت فيني الدنيا ما غير فكرة توديني و فكرة تييبني ، حتى يوم ييت أدفع من التدوده بدال لا أعطيهم الفلوس عطيتهم سويتج سيارتي!!

مشاعري تجاه الكيكة كانت تتارجح ما بين العشق و الإحباط الشديد ...لأن شوفوا شلون شكلها

تشووووووووووق زوغة ، بس حجمها حطمني !! أبي أبين لكم الحين شنو معناة 7 و نص إنش

هذا شريط القياس بالإنش و هذي إيدي ، يعني الكيكة حجمها أكبر من كف الإيد بشوي.

المهم طلعت منهم و شكلي جنه أحد معطيني سطار على ويهي .. لمحت محل من بعيد ولا أقرا إسمه "كب كيك بوتيك" ، قلت خوش ،أطلب منهم إن يحطون هالكيكة بالوسط و يصفون دار مادارها ريد فيلفيت كب كيك ، أتوقع إذا طلبت منهم ألحين راح يمديهم باجر النهار على الساعة 10 أو 11يوصلون لي الكيك

مشيت بسرعة و آنا مستانسة على فكرتي و ادش المحل ، اتلفت يمين يسار ، وين الكب كيك ؟

جان يقولون لا مدام احنا نبيع اثاث و هدوم!!

@@

عصبت عليهم .... عيل إشحقه مسمين نفسكم كب كيك بوتيك؟!!!

و اطلع منهم و فكرة الكب كيك مسيطرة على مخي ، جان اتذكر إن نورة وايد تحب الريد فيلفيت كب كيك مالت جوجوز ، و اطير من شويخ لين المهلب ، و كنت وايد متفائلة ، إهيا راح تكمل 28 سنة ، فراح آخذ 27 قطعة كب كيك منهم ، و الكيكة مالت نوفمبر بوتيك راح تكون الكيكة رقم 28 و راح نحط عليها الشمعة :)))))) (مسكينة وايد مصدقة عمري)

وصلت المهلب و أركض على المحل.

بليز أبي أسوي أوردر ريد فيلفيت حق باجر ، آنا ابيها الصبح الساعة 10 بس حتى لو تييبون لي الكيك الساعة 12 الظهر ما عندي مانع (يعني حليوة)

مدام آسفين ،ما نسوي طلبيات ألحين ، احنا ناخذ منتجات الالبان من كي دي دي ، و كي دي دي مصنعهم محترق فإذا تبين تطلبين نطري عقب أربع أو خمسة أيام!!!!

لاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااء

:"""""""(

شسوي ألحين آنا .... مو إلا كب كيك ... أصلاً مو إلا اودي هالكيكة ، أخليها حق بيتنا و أودي الدوام كيكة ثانية بدالها.

يا سلاااااااااااااااااام يا ميلو ، يوم إن مخج و اخيييييييييييييييرا قام يفكر صح ، ليش ما شغلتيه شوي أبجر؟

ألحين الساعة 9 بالليل ومابي كيكة عادية من اي محل ...وين أروح؟ لا oprah من دربي ... لا wow من دربي ... لا شوغر آند سبايس من دربي .. و حولي زحححححححمة زححححححححححمة زحححححححححمة ماني قادرة اطلع منها

ماكو إلا حل واحد

إييييه ... إيييييييه ...إنتي إلي بتسوين الكيك ، و راح تسوينها رد فيلفيت ، وراح تكون كب كيك ، مو هذا إلي تبينه؟؟؟

يالله ألحين جابلي يالله يمديج تخلصين.

أغراض الريد فيلفت معظمها موجودة بالبيت و مريت الجمعية بسرعة شريت الناقص و مريت على محل الورد إلي بجمعيتنا خذيت روز أحمر ...حسيت إني راح أحتاجه بالتزيين

الريسيبي من كثر ما سويتها حفظتها ، بس لييييييييييييييييييييييييييييييش ما تتسلط علي ذيج الليلة و تصير الكيكة جنها صخرة؟!!!

طاف طاف عادي تترقع ... يوم ذقتها ...ولا ناااااشفة...أي ناشفة إلا يابسة و تقرح اللهات بعد ... هـــَوْ ليش وين الغلط؟

و ارد المدونة أشوف البوست إلي كنت منزلته عن الرد فيلفت من قبل ، اثرا الكيكة نحط فيها نص قفشة صغيرة بيكربونات الصودا بس ، آنا عبالي بعد معاها بيكينغ باودر.

و اعيد الكيكة مرة ثانية.

إيه...

هذي كيكتي إلي أعرفها ... شوفوا الفرق بين الاولى و الثانية؟

إنتوا متخيلين شلون نص قفشة صغيرة من البيكينغ باودر زيادة على المقادير جذي تعفس الكيكة؟

المهم ...إن خلط الكيكة سهل بسرعة يخلص ...المشكلة إن الفرن إلي قاعدة أستخدمه صغير (لأن الخدم صكوا المطبخ الخارجي إلي فيه الفرن الكبير و راحوا ناموا) ،و القوالب إلي عندي تسوي 6 قطع بس ، فلازم انطر إلي موجود بالفرن على ما يستوي و أطلعه و أدخل القالب الثاني.

المهم... عيزت و آنا ادخل و اطلع بهالقوالب ، لين خلصت العجينة إلي عندي سويت 36 قطعة (3 درازن)، و آنا بعد خلاص ما عاد فيني حيل ، و الوقت بعد خلاص

الساعة 3 الفير.. يالله يمديني اريح شوي قبل الصلاة.

نمت شوية (ساعة او ساعة و نص) ، و عقب الصلاة نزلت المطبخ مرة ثانية علشان أحط "الفروستينغ" على الكيك ، كنت ناوية بالاول إني أستخدم جيس الزينة علشان يطلع شكل الكريمة مرتب ، بس واي مااااااااااالي خلللللللللللللللق، الـpiping عباله ، قررت أدهن ويه الكيك بالكريمة باستخدام سجينه عادية مو إلا يطلع شكل الكريمة مرتب.

اصلاً شكله جذي عجبني اكثر ، صج" فروستينغ" ،شكل الكيك جنه نازل عليه ثلج.

بعدين حق الزينة استخدمت أوراق ورد جوري حمرا (إلي تحبه سويت ريفينج ) و زينة كيك على شكل قلوب .

هذا شكلها بعد التزيين

بالدوام البنات يطالعوني ما غير أنقل من هالصحون

هَـــوْ ميلو إشيايبه ...مو قلتي بس كيكة

إي

هذي الكيكة :)))))))

البنات كل وحدة فيهم طلعت موبايلها و تجكجك بهالصور ، و نورة فرحتها لا توصف ، يا بنية بس قصي الكيكة عيزنا و احنا ننطر ، لا لا لا نطروا بعد صورة ...خلاص الشمع ساح ... بعد شوية شوية.

و أخيييييراً ما بغت العروس تقطع كيكتها

البنات كل شي عجبهم ..حتى الشموع سألوني عنهم (تحصلونهم بمركز سلطان ... مركز سلطان لازم يعطينا رعاية آنا و بنت الديرة ، مير كل اغراضنا منه)

نيـِّي حق تقييم الكيكتين ... اول شي كيكة نوفمبر بوتيك ترفة و وايد لذيذة أفكر إني اطلبها بمناسبات ثانية بس اكيد الحجم راح يكون أكبر.

الكيك إلي آنا مسويته وايد عجب البنات ، قالوا إنهم ما حسوا بفرق بالطعم بين الكيكتين ، في ناس قالوا الكب كيك مالي سكره أقل...صحن كامل خلص و الصحن الثاني بقى نصه تقاسموه البنات كل وحدة خذت معاها جم قطعة حق اليهال بالبيت ، كيكة نوفمبر بوتيك بقى منها مثلث خذته نورة معاها...المهم إن كل شي خلص حتى الشمع تقاسموه :))

مقادير الريد فيلفيت تلقونها في هذا البوست (اضغط هنا)

تصوير : mellow

mini burgers...diet friendly

عزيزتنا بنت الديرة توها منزلة موضوع عن الهوم ميد بيرغر ، و طلبت إن نسوي مسابقة لأفضل وصفة بيرغر...وصفتي خارج المنافسة لأن هامبرغر الدايت مهما كانت لذيذة فهي ما تنافس الهامبرغر الأصلية في لذتها.

بنوته ...وصفتج وايد لذيذة لا تدورين على غيرها there won`t be better than that صدقيني ، بس قربي شوي خن أساسرج ( جربي تشيلين البقسماط أو البيض أتوقع ما راح تحتاجينهم و يتراوالي النتيجة راح تطلع بعد ألذ ;) )



آنا خذيت طريقتج و غيرت فيها علشان تناسب إلي بيسوون رجيم ، إستخدمت لحم 95% lean يعني بس 5% دسم ، طبعاً هامبرغر الرجيم لو شنو بتطلع لذيذة ما تقايش الهامبرغر الاصلية ، طلعت ناشفة بس طعم البهارات فيها وايد غطى على مشكلة نشافة اللحم ، و بيتنا وايد إستانسوا عليها ، و ادري لو بسويها بطريقتج بتطلع ألذ بمراحل.



ألحين نيي حق قراء المدونة :))



في شي مهم لما نيِّي نسوي الهامبرغر

when it comes to burgers ,it`s all about the meat



مو البهارات ولا الصمونة ولا شي ثاني ،إذا نبي نوصل حق أحسن وصفة في صنع الهامبرغر لازم نتعب شوي على نوعية اللحم.

بنت الديرة أسهبت في شرح هالنقطة بس أجد نفسي مضطرة إني أعيدها ،إذا نبي الهامبرغر مالتنا تكون طرية و juicy ، نسبة الدسم إلي المفروض تكون في اللحم المستخدم في عجينة البرغر لازم تتراوح ما بين الـ20-30% ،و اكثر جزء من اللحم البقري يستخدم في صنع البرغر إسمه chuck وهو اللحم الموجود بالكتف و الرقبة ، نقدر نستعيض عنه بأنواع ثانية و ممكن نخلط اكثر من نوع (مثل ما سوت بنت الديرة و عشان جذي أتوقع الهامبرغر مالتها ألذ) و يمكن أكثر جزء قريب في طراوته من الـchuck هو الريب آي rib eye ، و أيضاً من الأجزاء إلي وايد تستخدم في صناعة البيرغر هو السيريليون.

لكن إلي بيسوون ريجيم راح يواجهون مشكلة ، لأن في قرص الهامبرغر الواحد (من غير الجبن و المايونيز و غيره) يحتوي على 34 غرام من الدهون أي ما يعادل أكثر من ثلث إحتياجنا اليومي من الدهون و هذي النسبة تعتبر كبيرة ، فإذا في بالنا نقلل كمية الدسم لازم نقلل كمية الدسم في اللحمة نفسها و هني يواجهنا تحدي ثاني ، وهو أن اللحم قليل الدسم يعتبر من الأنواع الأقل تفضيلاً في صنع الهامبرغر لأنه ماله طعم ، و صعب التشكيل ، وناشف

لكن هالمشكلة يقدر الواحد يلتف عليها عن طريق المكونات إلي ممكن نضيفها لعجينة البيرغر علشان تعطيها طعم أحلى و طراوة اكثر ، اما التشكيل فنقدر نضيف الـbinding factors أو العناصر اللاحمة مثل البيض و البقسماط ، و آنا علشان اوصل لأقل كمية من الدسم إستخدمت بياض البيض بدون الصفار.



أما التوابل فخذيتها مثل ما إهيا من طريقة بنت الديرة ، و ضفت للساندويتش جبن موتزاريلا part skimed (شبة خالي الدسم) من كرافت و صلصة بيستو... و بدال الفرينش فرايس قدمت الميني البيرغر مع roasted potatoe.







الهامبرغر مثل ما توقعت طلعت ناشفة بس طعمها لذيذ وعموماً النتيجة النهائية طلعت وايد حلوة ، أمي و ابوي أستانسوا عليها ،و أعتقد إنها بديل جيد للبيرغر الأصلية حق إلي بيسوون رجيم ، لكن حق إلي يبي الطعم الكامل و الطراوة أعتقد إن الريسيبي مالت بنت الديرة تفي بالغرض.



قبل لا أحط المقادير بس عندي بعض الملاحظات إلي لازم نحطها في بالنا لا بغينا نسوي برغر من لحم lean قليل الدسم مثل إلي آنا إستخدمته :

-نبي نحافظ على قد ما نقدر على كمية الشحم القليلة الموجودة في اللحمة ، علشان جذي لازم نعجن اللحم بقفشة مو بالإيد ، لأن حرارة الأيد كفيلة إنها تذوب الشحم الموجود ، إيدنا ما نستخدمها إلا حق تشكيل العجينة.

-إذا البيرغر ما طلع شكله مدور ، عادي ، طاف ، لأن مثل ما قلنا اللحم قليل الدسم صعب التشكيل.

-أقراص البيرغر نلفهم باوراق نايلون او ممكن نحطهم في أكياس نايلون صغيرة (ملوت الساندويتش) و نخليهم بالفريزر لمدة ما تقل عن ساعة علشان تتماسك شوي قبل لا نشويهم.


بنفس الوقت أنصح بشدة قبل لا تسوون الهامبرغر إنكم تطلعون على موضوع بنت الديرة لأنه فيه ملاحظات مهمة في صنع البيرغر.

المقادير :

نص كيلو لحم مفروم قليل الدسم (نسبة الدسم 5%)

بياض بيضتين

مغلف واحد شوربة بصل (ليبتون ...مثل إلي إستخدمتها بنت الديرة)

3 ملاعق كبيرة صلصة ووسترشاير

ملعقة كبيرة صلصة ليكويد سموك

ملعقة صغيرة بهارات خاصة باللحم (ماكو ماركة معينة ، إختاروا منها إلي خاصة بالستيك)

صمون صغار

جبن موتزاريلا قليل الدسم

صلصة بيستو (ممكن تشترونها جاهزة أو تسوونها بالبيت ،آنا سويتها بدون جبن بارميزان بس ريحان +قفشة كبيرة صنوبر+فصين ثوم صغار+زيت زيتون+ملح و فلفل أسود حسب الرغبة)

الطريقة:

-نغسل اللحم و نضيف له بياض البيض +شوربة البصل+وورشسترشاير+ليكويد سموك+بهارات و نخلطهم بالملعقة.

-نأخذ مقدار ملعقة طعام واحدة (ما يعادل حجم حبة جوز) من عجينة اللحم و نضغطها براحة اليد و نلفها بورق نايلون أو نضعها في أكياس نايلون و نتركها بالفريزر لمدة ساعة.

-ندهن المقلاة بكمية قليلة جداً من الزيت و نصف أقراص الهامبرغر و نتركها تنضج على نار هادئة، و بما أن اللحم قليل الدسم ينضج بشكل أسرع من اللحم العادي نحرص على آلا نترك البرغر على النار لمدة اطول من اللازم .

- ندهن "الصمون" بصلصة البيستو و نحشيه بأقراص البيرغر و شرائح الموتزاريلا و نصفه في صينية وو ندخلها الفرن إلي أن تذوب الجبنة.

-تقدم مع roasted potatoe

طريقة عمل الـroasted potatoes:

-نقوم بتقطيع 3 حبات متوسطة من البطاط على شكل أجنحة متوسطة إلى رفيعة السمك.

-نسلق أجنحة البطاط نصف سلق في ماء مغلي ثم نصفيها من الماء.

-نضع البطاط في صينية فرن و نصب عليها كمية من زيت الزيتون و الملح و الفلفل الأسود و الروزميري.

-يشوى البطاط في فرن حار (240-250 درجة) لمدة 20-30 دقيقة أو إلى أن تشقر.

تصوير : mellow

julie`s julia .. and my nigella

بعدي ما شفت الفيلم لكن قاعدة انطره ينزل على أحر من جمر ، على حد علمي المتواضع هذا أول فيلم يسوونه عن مدون "أو بالاحرى مدوِّنة" ، وهي المدوِّنة جولي باول صاحبة مدونة جولي آند جوليا.
يحكي الفيلم قصتين حقيقتين عن إمرأتين يفرقهما الزمان و المكان لكن جمعهما حب الطبخ.
جولي باول موظفة بسيطة من نيويورك حست إن حياتها باهتة فحطت لنفسها هدف وهو إنها تألف كتاب يحكي قصتها و محاولاتها لإنقاذ زواجها و إيجاد حلمها و إنعاش روحها عن طريق تطبيقها لكل وصفات جوليا تشايلد صاحبة برنامج bon appetit المتخصص في الطبخ الفرنسي

و صاحبة كتاب mastering the art of french cooking

وفي سنة 2002 إفتحت جولي باولز بلوق تكتب فيه يومياتها مع الطبخ و يومياتها مع تحضير كتابها إلى أن أصبح هذا البلوق من أكثر المدونات متابعة، وفي عام 2005 أنهت كتابها julie and julia :my year of cooking dangerously.

(لاحظوا ... كتكوتي دخل التاريخ :) ... حلاته)

الجدير بالذكر أن جوليا تشايلد ما تعلمت الطبخ إلا بمرحلة متأخرة من عمرها (كان عمرها 37 سنة يوم دخلت مدرسة الطبخ) حتى يوم كانت صغيرة ما شافت أمها تطبخ لأن كان عندهم طباخ(أو طباخة).و في عام 1951 بعد ما أتمت تعليمها في مدرسة الطبخ في باريس لمدة 4 سنوات ، بدت جوليا تشايلد مع 2 من صديقاتها بتعليم الطبخ و إفتتحوا مدرسة إسمها. École des trois gourmandes

يوم قريت قصة الفيلم قعدت أفكر ساعتها ، لو آنا مكان جولي باول، و أبي أسوي نفسها وأطبق وصفات شيف معين كل يوم و لمدة سنة كاملة ، فأي شيف راح أختار مكان جوليا تشايلد؟
بالتأكيد راح تكون الرائعة نايجيلا لاوسن.

هالمرا أحبها !!
إضافة إلى وصفاتها إلي ما قط مرة خابت ، كلامها و لهجتها الإنجليزية الهادئة و نبرة صوتها المطمئنة و نصائحها " الأختوية" و روح "ربة المنزل" إلي تشع منها وجمال ملامحها ،كل هالعوامل كانت كفيلة إن تامن لها قاعدة جماهيرية كبيرة .


هذي بعض الاطباق إلي تعلمتها من نايجلا لاوسن ، أدخلت فيها بعض التغييرات ، بس بالأخير it turned out to be a hit :))



chicken pot pie




من سلسلة نايجلا إكسبرس للوصفات السهلة و السريعة ...هذا الفيديو يبين شلون سوتها نايجلا و تحتها بكتب شلون آنا سويتها






المقادير:



شرائح سلامي (إستخدمت السلامي بدال البيف بيكن أولاً لأنه موجود بالجمعية مالي خلق أطق درب لين مركز سلطان و بعدين لأن السلامي فيه بهارات أكثر و دهون أقل)

مشروم فريش (نص العلبة)

فليهات دياي مقطعة شرائح

مكعبين ماجي خضار مذوبين بكوب ماي (ماكان عندي بالثلاجة مكعبات دياي ، إذا بتستخدمون إلي على دياي إستخدموا واحد بس لأن ملوحته أكثر من إلي على خضار)

طحين

ملعقة صغيرة زعتر ناشف (ممكن إضافة أعشاب أخرى مثل الروزميري أو الـsage "المرامية" أو الأوريغانو)

عجينة بف باستري جاهزة

الطريقة:

حطيت الجدر على الجولة و خليته شوي يسخن بعدين قصصت السلامي (بالمقص مثل ما سوت نايجلا) و شوحته على النار (بدون زيت) لما تحمش.

قصصت المشروم و ضفته للسلامي و قلبته شوي .

نغمس الدياي بالطحين و الأعشاب و نضيفه للباجي بالجدر و نقلبه على النار بعدين نصب فوقه الماجي و نتركهم يطبخون ، بهالوقت أزهب البف باستري (آنا العجينة إلي عندي كانت متينة إضطريت إني أقصصها شرايح و أرقها شوي) بعدين مثل ماهو موضح بالفيديو نقص جزء من العجينة على شكل شرايح و نلزقها على حاشية القالب و الجزء الباجي من العجينة نقصه على شكل دوائر و نخليها حق بعدين.

نزيد الماي لخلطة الدياي و المشروم و نخليها على النار شوي لما تتسبك (إذا طلعت الزفرة نشيلها) ، نزهب الفرن و نسخنه على درجة حرارة 200.

ألحين نصب خلطة الدياي بالقوالب و نحرص إن ما نترس القالب لي الأخير ، بعدين نغطي وجه القوالب بالدوائر إلي سوينها من البف باستري و نقظظ العجينة بالشوكة و نحط القوالب بالفرن و نخليهم لما تتحمر العجينة


ناكل الطبق مثل طريقة أكل نايجلا :))

:lamb cutlets







إهيه حاطه معاه زيتون و فلفل أحمر حار آنا شلتهم و قدمت اللحم مع mashed potato و زدت كمية الصلصة شوي إذا تبون الطريقة الأصلية ضغطوا هني :


المقادير: كيلو ريش غنم - 3 فصوص ثوم مقطعين شرايح - بصلة صغيرة مبشورة- عصير ليمونة واحدة + نصف ملعقة طعام من بشر قشر الليمون - 4 إلى 6 ملاعق طعام زيت زيتون - أوريغانو - ملعقتين صغار مسترد (يفضل ماسترد ديجون).


- نشيل الشحم على قدر المستطاع من العظام (نقصه بسكين أو مقص قوي) بعدين نحط الريش داخل جيس نايلون (ممكن نستخدم جيس الفريزر) و نطرق اللحم (بالهاون أو بمطرقة خاصة) إلى أن تقل سماكته.


-نسوي تتبيلة من باقي المقادير و نخلي اللحم يتتبل لمدة 20 دقيقة إلى ساعة.


- نحط شوية زيت بالمقلاة و بعدين نشيل التتبيلة من اللحم (نسلتها بالسكين و نحتفظ بالتتبيلة ما نقطها) و نحمر الريش على الوجهين ( المقلة يمكن ما راح تكفي فناخذ 3 قطع و نخليهم لما يستوون بعدين نشيلهم و نحط 3 ثانيين و هكذا).


- ألحين نجمع قطع الريش المستوية كلها نحطها بالمقلاة و نحط فوقها ملعقتين كبار من التتبيلة و نغطي اللحم بالماي (كوب و نص) و نخليه يطبخ لمدة 5إلى 7 دقايق.


- نشيل اللحم و نصفه بصحن التقديم ، أما الصلصة فنضيف لها خليط مكون من ملعقتين كبار طحين مذوبين بشوية ماي و نخليها على النار لما تصير شوي ثقيلة.





-نصب الصلصة فوق اللحم و يتقدم الطبق مع الmashed potato.

طريقة عمل الـmashed potato :


3 حبات بطاط متوسطة الحجم - فص ثوم صغير مهروس- ملح+فلفل أسود - ربع كوب حليب+ربع كوب كريما.

نسلق البطاط بقشرته إلى ان يلين بعدين نتركه يبرد شوي و نشيل عنه القشر و نهرسه بظهر شوكة.

نضيف له باقي المقادير و نخلطهم مع بعض زين.





تصوير : mellow