once upon a morning

أضبط المنبه على الساعة 3:30 حق صلاة الفجر ، بعدها يبيلي 10 دقايق على ما أستوعب إني لازم أقوم ، بعدين أقضي الوقت لين تطلع الشمس ما بين صلاة و قرآن و أذكار أختمهم بركعتين سنة الإشراق ... أغفي شوية (إي هيـِّن) ، لين الساعة 6:30 و بعدين فجأة !!! الوقت يركض .. و آنا أدابج وراه..لازم ألحق أبصم قبل لا تعدي الـ7:30 ، أركب سيارتي ...ما أعرف شي إسمه بريك ...ما غير أركض جنه أحد لاحقني..أوصل المواقف و أسفط و بعدها إيي الماراثون ..أركض أركض .. تكرمون جوتيي يتنتف .. كعبي ينعوي ..ريجي ينشف..نفسي ينقطع .. و أبصم 7:29

هذي حالتي كل يوم ، أعد الوقت و أطالع الساعة و أحسب الدقايق ، أجمع و أطرح و اقسم و ادخل في معادلات و متواليات، علشان أوصل الدوام حده حده ولا متأخرة دقيقة.

و انطر الويك إند ... مو علشان انام لأ...علشان أشوف إلي كل يوم اغفل عنه و اعيد اكتشاف صباحي من يديد

بروحانيته





بخضار حديقتنا الزاهي

عطر ياسمينتنا البارد

و ذكريات الفل ، فلتنا من سنين هذا مكانها و إنتاجها غزير ما شاء الله بس أبوي هالمرة قطع الورد إلي بالشجرة كله و سواه بوكيه حق أمي

(تأثير المسلسلات التركية جداً قوي عليه) ، أشوه خلى هالوردة (أو هالعنقود) أصورها و أتذكر فيها يوم كنت صغيرة خذيت فل و طحنته مع ماي ورد علشان أسوي عطري الخاص فيني .. بس النتيجة كانت مو شي :(

و آنا سويت لي هالبوكيه (مع الإستعانه بجم فلة من بوكيه ابوي) ، دايما البوكيهات الصغيرة إلي تكون ورودها من حديقة البيت لها جمالها الخاص غير عن البوكيهات المنمقة إلي نطلبهم من المحلات


إن زين الحين شسوي ؟

آنا بكل ويك إند أحب أقضي الصبح بالطبخ و المطبخ ، أفاجئ البيت بريحة كب كيك توه طالع من الفرن ، او إني أروح الجمعية أشتري أغراض حق طبق أسويه حق الغدا ، بس هالمرة أبي شي حقي بروحي محد يشاركني فيه.

شنو أتريق؟

إممممممممممممممممممم

شي تقريباً مثل هذا .. فروت ساندويتش

توست مع كريم تشيز و توت أحمر (ما يخلى الفريزر منه) و فوقهم maple syrup مع جاي بابونج .

هذا ريوقي

الإستمتاع بالأكل مو بالضرورة يدخل من ضمنه وجبة وجبة كبيرة أو طريقة تحضيرها معقدة ، أهوه بس بأي حال الواحد كان قاعد ياكل و شلون قدم الاكل حق نفسه ، يعني آنا كل يوم اتريق بس عقب ما اخلص ما أتذكر شنو كليت !!




صارت الساعة ثمان إلا ربع ؟!!

يعني في وقت أرد انام لي الساعة عشر؟

يا من حظي :))))

صباحكم فل و ياسمين

pumpkin cake

تعودت في تاريخ معين من كل سنة أتوجه إلى مكتبي..أفتح الباب .. و فجأة!

surrrrrrrpriiiiiiiiiiiiiiiiiiise

happybirthdaaaaaaaaaaaaaaaaaaaay:)))))

و بعدين ألقى جدامي pumpkin cake....يمكن هالمشهد صار له 3 سنين يتكرر ولازم في كل مرة ألقى pumpkin cake من محل كاراميل.

أتذكر أول مرة يوم سألت البنات شنو هالكيكة ؟يوم قالوا لي كيكة قرع ،كانت ردة فعلي..

(إستغفرالله ياربي) :((

ما أستلطف القرع شكو يحطون لي إياه بكيكة عيد ميلادي ، جان إستشاروني قبل لا يسوون لي هالمفاجأة ..ألحين شلون بجاملهم؟

وما ان هميت بأداء دوري بمسرحية المجاملة ... كان الحب من "القضمة" الاولى :))

و من بعدها صرت بيوم ميلادي قبل لا ادش المكتب ، أتوقع الصيحة ...

و أتمنى الــpumpkin cake

كيكة القرع مثل ما توصفها إحدى الزميلات..قاتلة

كيكة من طبقتين (أو 3 طبقات) محشية بالـcream cheese ومغطاة بالتوفي...أظنتي كلمة قاتلة وصف مناسب جداً لها

الواحد لما ياكلها يحس بلذة الخطيئة علشان جذي ما قط مرة شريتها بأي مناسبة (لأني أدري إني راح أقضي عليها) و أكتفي إني آكلها من سنة لي سنة.

بس شلي خلاني أفكر إني أسويها بغير وقتها؟

كانت جندل منزلة موضوع عن كيكة الريد فيلفت ويم قلت لها إني أعرف أسويها طلبت مني إني أسويها و أنزل بوست فيه الطريقة و المقاديرجندل تطلبت مني ريد فيلفيت؟...يا غالي و الطلب piece of cake

ورحت الجمعية..أدور على الصبغة الحمرا (إلي إهيا أساس الريد فيلفيت) و أدور أدور رحت جمعيتنا رحت مركز سلطان ...ماكو :(

جان القى بويهي هذا

علبة بيوريه القرع إلي تستخدم لعمل الpumpkin desserts ...قلت ليش لأ ...و آنا كنت حاطة في بالي أسوي كيكة من طبقتين لأني كنت شارية من تركيا الspatulas إلي تستخدم في الحشو و التغطية و شارية عدة تزيين الكيكة فودي أجربهم.

و بدينا بالشغل مع أول تجربة لي بعمل كيكة من طبقتين و أول تجربة لي بالتغطية.

دخلت يوتيوب و لقيت جم فيديو tutorial علشان أتعلم الطريقة

طريقة وضع الحشوة

طريقة تغطية جوانب الكيكة

طرقة تغطية أعلى الكيكة

أول شي قبل لا أشتغل و اسوي الكيكة حطيت علبة حليب نسله المركز و المحلى في الماي المغلي لمدة 4 ساعات

و هذي هي إحدى الطرق للحصول على صلصة التوفي

هذا شكل الحليب بعد ما إنغلى لمدة أربع ساعات و راح تكون الصلصة شوي متكتلة

فنخفقها علشان نكسر الكتل بمساعدة كتكوت :))

نزهب الصحن قبل لا نشتغل..

هذي الطريقة تعلمتها من أبله نايجيلا لاوسون ، نشقق أوراق زبدة و نغطي فيها اطراف الصحن قبل لا نحط عليه الكيكة علشان لا يتوسخ الصحن بالكريما و أحنا نشتغل ، بس نخلص نجر الأوراق و يطلع شغلنا مرتب و نظيف.

أوكي

ألحين نحشي الكيكة

(إشدعوه هالكثر كريما!!!!) @@

أدري أدري بس القاعدة في حشو الكيكة تقول حطي كريما أكثر من الحاجة و بعدين شيلي الزايد لأن إذا حطيتي شوية راح تتكسر الكيكة معاج و إنتي تمدين الكريما

و مدينا الكريما

ألحين نحط الطبقة الثانية من الكيكة و نمسح إلي طالع من الكريما لي بره على جوانب الكيكة ، وبعدين نغطي الكيكة كلها بالكريما

not wow ..but good for a first attempt

أوكي ألحي ننشيل أوراق الزبدة من تحت الكيكة و نصب التوفي من فوق و نزين بالجوز المكسر

و مع شوية تفاصيل صغيرة علشان نزين الكيكة من الحاشية

تراااااااااااااااااااا

*********

ييت ذاك اليوم و فتحت الثلاجة ولا

ما شاء الله ...أثرا البيت طايحين فيها:))

أستانس أشوف هالمنظرعليهم بألف عافية:))

تصوير:mellow
*******

المقادير

علبة لب قرع مهروس-كوبين و نص طحين-كوبين سكر (أقل أو اكثر حسب الرغبة ، المرة الثانية ناوية أقلل السكر)-كوب زيت نباتي

3 بيضات-ملعقتين صغيرتين فانيليا-ملعقة صغيرة بيكينغ صودا-ملعقة صغيرة ملح-ملعقة صغيرة دارسين مطحون-4 حبات قرنفل (مسمار) مطحونين

للتغطية و الحشو(ملاحظة: إذا أردتم فقط حشو الكيكة دون تغطيتها يستخدم نصف المقدار)

قالبين زبدة غير مملحة بدرجة حرارة الغرفة-4أكواب سكر بودرة-علبتين جبنة فيلاديلفيا (سعة 300 غرام للعلبة الواحدة)-ملعقة صغيرة من الفانيليا

طريقة عمل الكيكة

-ندهن قالبين دائريين بالزيت و نرش عليهم القليل من الطحين و نسخن الفرن على درجة حرارة 175 درجة مئوية.

-بالمضرب الكهربائي نخفق كلاً من لب القرع و البيض و الفانيليا و السكر و الزيت-نضيف المكونات الجافة (الطحين+البيكنغ صودا+الملح+الدارسين+القرنفل) للخليط السابق و نتابع الخفق إلى أن تتكون لدينا عجينة دبقة و متجانسة.

-نصب الخليط في القالبين و نخبزهما لمدة 50 دقيقة إلى ساعة كاملة في الفرن ثم نخرج القوالب

- ننترك الكيك يبرد (مهم) قبل أن نحشيهما و نغطيها بالكريما.

_نخرج الكيك من القوالب و نغطي الطبقة الاولى بكريما الجبن و من ثم نغطيها بطبقة ثانية من الكيك ثم نغطي الكيك بالكامل بكريما الجبن

-نصب صلصة التوفي

.طريقة عمل كريما الجبن

نضرب الزبدة مع السكر البودرة (ملاحظة: نضيف السكر تدريجيا إلى الزبدة بمقدار أربع ملاعق في كل إضافة حتى لا يتطاير غبار السكر البودرة)

-نضيف جبنة الفيلاديلفيا إلى خليط الزبدة و السكر مع ملعقة صغيرة من الفانيليا