السبت، ٨ مايو ٢٠١٠

roasted leg of lamb



ما صارت عيد !!

طبعاً بداية أشكر كل من سأل عني و أعتذر عن كل إلي ما قدرت أرد عليهم بالفترة إلي طافت.

كل يوم أقول برد بس ببوست مرتب و معتبر لين أنترست كاميرتي من الصور و حضرة المعتبر ليلحين ما طلع للوجود ، بعدين قلت بس خل أحط إلي أحطه مدونتي تكود عليها الغبار من زمان ما فتحتها ، عاد طلع معاي فخذ هالخروف ، خن نقول إن هالبوست ياي بمناسبة العيد إلي طاف إلي صار لي مادري جم شهر أحتفل فيه ، أو العيد إلي إن شاء الله ما بقى شي على ييته ...مادري اختاروا المناسبة إلي تعجبكم.

بالأول إلي يسمع كلمة (فخذ خروف مشوي) يحسبه شي مستحيل بس ترى سهل ما يبيله شي، كلش كلش ما يبيله مجابل و النتيجة رائعة ،يعني مو معقولة اللحم شلون يصير طري ، طريقة الطبخ تعتمد على الـ slow roasting إن اللحم ينحط على درجة حرارة منخفضة لمدة 4 ساعات بالفرن و يتغطى زين بالقصدير ، عاد إنتي بأول ساعتين حطي اللحمة بالفرن بعدين روحي شوفي لج شغلة (روحي استقبال ولادة .. عزا...جمعية...كملي ختمتج .. عجفي شعر بنتج خصلة خصلة بعدين ردي فليه... سوي meditation..) ، لا خلصت الساعتين ردي المطبخ و قلبي اللحمة على الويه الثاني و حطي معاها الخضرة و ردي غطيها مرة ثانية بالقصدير ، بعدين روحي الأفينيوز تمشي شوية و أوقفي بطابور بينك بيري و إخذي لج بينك بيري (طبعاً لا تاكلينه وراج لحم) لما تطوف ساعة و نص ردي البيت وشيلي القصدير عن اللحمة و خليها بالفرن لمدة ربع ساعة (على ما تبدلين هدومج) و بعدين قدميها ...إشرايكم فيني و آنا أخطط لكم يومكم :)


المقادير:


فخذ خروف صغير الحجم (يجب أن يكون ملائماً تماماً لحجم الصينية) يزال عنه الشحم الزائد (مع مراعاة عدم المبالغة في إزالة الشحم حتى لا يفقد اللحم طراوته خصوصاً أننا لن نستخدم أي نوع من الزيوت في التتبيل)


خضار متنوعة حسب الرغبة (حبات بطاطس صغيرة مقطعة إلى أنصاف ، مشروم يترك كاملاً دون تقطيع ، حبات بصل صغيرة الحجم مقطعة إلى أنصاف )


زيت زيتون (كمية كافية لتغطية الخضار)


للتتبيل :


فصوص ثوم مقطعة إلى أنصاف بشكل طولي

أوراق روزميري (إكليل الجبل) طازجة أو من الممكن إختيار أي نوع من الأعشاب العطرية على أن تكون خضراء و ليست مجففة (مثل الزعتر أو النعناع أو الريحان أو الميرامية sage )


مسترد و يفضل النوع الذي يحتوي على حبوب المسترد أو كما يسمى whole grain mustard


maple syrup يباع في الجمعيات تحت إسم شراب القيقب


liquid smoke أو أي بهارات مشكلة خاصة باللحم





الطريقة :

يفضل تتبيل اللحم لمدة ليلة كاملة

- بعد إزالة الشحم ، نغطي اللحم بالمسترد تماماً، ثم نقوم بعمل شقوق صغيرة و عميقة بعض الشيء في أماكن متفرقة من الفخذ.
- نغرس في كل شق فص ثوم و بعض أوراق الروزميري.
-نصب الـmaple syrup على كامل الفخذ ثم نرشه بالبهارات أو بصلصة الـliquid smoke ثم نضعه بالثلاجة لمدة ليلة كاملة.
ملاحظة : لا نستخدم الملح في التتبيل حتى نحافظ قدر الإمكان على السوائل الموجودة في اللحم.
-في اليوم التالي ...نحمي الفرن على درجة حرارة 150 و نغطي صينية اللحم جيداً بالقصدير وندخلها الفرن لمدة ساعتين.
-بعد إنقضاء الساعتين نقوم بقلب اللحم على الوجه الآخر و نضيف الخضار و نصب عليها زيت الزيتون و نتبلها بالملح و الفلفل الأسود و ممكن إضافة بعض أغصان الروزميري و نغطي الصينية بالقصدير مرة ثانية.
- بعد ساعة و نصف نزيل غطاء القصدير عن الصينية و نترك اللحم و الخضار لمدة ربع إلى نصف ساعة إضافيين حتى تتحمر الطبقة العلوية حسب الرغبة.





تصوير :mellow

هناك ١٤ تعليقًا:

chandal/danchal!! يقول...

بالعافية

:)

يمدي نروح جدة ونعتمر ونتعشى هالعشا الطيب

والحلو بعد ما حاجة.... سككري مع دلة قهوة

:p


الله يواليج العافية... شكله طيب وخنين

:)

mellow يقول...

جندولة

لوووووووووووووووووووول يصير يصير مع السايق إلي قطكم الحرم إنتي ويا الوالد ذيج السنة ... أصلاً تردون تلقون اللحمة ليلحين ما استوت ..عاد ساعتها تروحين بينك بيري على ما يجهز العشا

حبيبتي الله يعافيج :**

Sweet Revenge يقول...

ماشا ء الله شكله شهي ولذيذ وتسلم الايادي علي الطبخة ومبروك العودة ,عودة دسمة ولذيذة ;)

bent el deera يقول...

اول شي ولكم باااك
فز قلبي يوم طلع لي بالريدر

حبيت اهني واقولج مكانج شكبره لا تقاطعين جذي مره ثانيه :****

الحين بقرا الوصفه ... شكلها يشوق ما شاء الله :>

تسلم االايادي مقدما

mellow يقول...

هلوووووو سويييتيي :))

الله يبارك فيج بس والله مو دسم ولا صعب أفكر إن شاء الله أسويه مرة ثانية حق ردة أخوي من السفر :)

mellow يقول...

بنووووتاااااااا

حبيبتي إسم الله عليج من الفزات ... بليز عذروني إذا طولت و ما رديت عليكم لأن صاير هالأيام إذا إنشغلت آخر شي ممكن أفكر فيه لما أفضى إني أفتح اللاب توب و ماشاء الله اليوم يركض مادري شلون.

قولي لي رايج .. عاد آنا كلش ما أقايشج :**

ERROR! يقول...

خووش طبق .. الله يعطييج العافية ..

شوقتيني أسويه :) ..

سؤال ماعليج أمر .. من وين أحصل ( liquid smoke ) ؟ أنا حصلت ( wood smoke ) ماركته HP هل أهوا نفس الشي ولا لا ؟

mellow يقول...

يا هلا والله ارور
الليكويد سموك لقيتها بمركز سلطان بس الوود سموك هذي اول مرة اسمع فيها !

ان شا الله يعجبكم الطبق :))

ARTFUL يقول...

قمت ابولع بريجي واتنطع



تسلم ايدج

بس عسا ماهو زفر نفس ذاك اليوم؟؟

p;

mellow يقول...

آرتفل :)

ما أسوي شي زفر :)

Ļa ƒéммé يقول...

يعطيج العافيه اللهم آمين زوجي خاطره اسويله فخذ خروف عندي طريقه حلوه بعد بس انظيف لبن للتتبيله او روب عشان يطرى اكثر اللحم ..واللي امأخرني انه ابي اشتري الماعون اللي يسمى طاجن ماعون وليمة الملك اللي يلمع ومعاه غطا لووووول بحطله الفخذ فيه ..

bent el deera يقول...

صج صج صج ولهت عليج يا بنيه
اين انتي؟

غير معرف يقول...

من جد الجد ولهت عليج :***

مكانج شكبره

غير معرف يقول...

كل ما اوله عليج ادش البلةق اتصفحه
اتمنى تكونين بافضل صحه وعافيه
ولهت عليج :****