:))) say cheeeeeeeeese

for a brand new blueberry cheesecake

تجري بين مدونات الطبخ بين الفترة و الثانية نوع من التحدي يسمونه daring baker ، بحيث يعطونك مقادير نوع من أنواع الحلويات وكل صاحب مدونة طبخ يسويها بطريقته الخاصة و يشوفون من تضبط عنده المقادير ،منها التشيزكيك إلي تيي على شكل لولي بوب

ألحين كل شي على لولي بوب صار موضة ، من الكيك إلى الفطاير ، كل شي يسوونه بحجم الـbite size و يقزونه بعود.

الطريقة أسهل مما تخيلت ... مجرد إن نسوي كيكة تشيزكيك عادية

و بعدين ناخذ قطعة صغيرة و نكورها بالإيد و نقزها بعود و خلاص!!

آنا حطيت مع خلطة التشيز كيك ربع كوب توت أزرق " بلوبيري" علشان يعطيه لون شوي funky ياي على بنفسجي مزورق :)





it was fun to do and realy delicious


المقادير:

علبتين جبنة فيلاديلفيا

3 بيضات


3 ملاعق صغيرة فانيليا (ملاحظة: في حال إستخدام الفانيليا البودرة و ليست السائلة نستخدم نصف المقدار ، أي ملعقة صغيرة و نص فقط)



نص كوب كريما (أو ساور كريم)

كوب سكر

3 ملاعق كبيرة طحين

ربع كوب توت أزرق blueberry مثلج أو فريش + ربع كوب توت احمر raspberry +نقطة صغيرة جداً ملون طعام أزرق (هذه الخطوة إختيارية حيث يمكن إبقاء التشيزكيك سادة )


للتزيين: 150 غرام شوكولاته - كاكاو فليك - زينة ملونة أو مكسرات مطحونة

الطريقة:

-تخفق الجبنة مع البيض و الفانيليا ثم نضيف السكر و الكريما و بعدها الطحين و التوت. (إذا الخلطة طلعت سائلة ماي مايوه عادي لا تخافون خيرتها بتصك بعدين بالفرن)

-نصب الخلطة في قالب و توضع بالفرن على درجة حرارة 140 لمدة ساعة.

-توضع التشيز كيك في الخارج حتى تأخذ درجة حرارة الغرفة ثم توضع في الثلاجة لمدة 3 ساعات أو لمدة ليلة كاملة.

- نغرف مقدار ملعقة صغيرة من خلطة التشيزكيك و تشكل على هيئة كور و تغرز بأعواد (يمكن إستخدام أسياخ الخشب الخاصة بالشوي) و تصف في صينية مبطنة بورق القصدير و توضع في الفريز لمدة ساعة إلى ساعتين.

-نذيب الشوكولاته في حمام مائي أو مايكروويف و نتركها لتبرد بدرجة حرارة الغرفة.

-نخرج أعواد التشيز كيك من الفريزر و نغمسها في الشوكولاته الذائبة ثم ينثر فوقها أي نوع من الزينة (آنا إخترت كاكاو فليك + نوع من الزينة الملونة و يمكن استخدام المكسرات).

تصوير : farawla^foshya

classic lasagna

من زمااااااااااااااااااااااان عن المطبخ !! مو؟

:)

أذكر السنة إلي طافت إني فتحت هالبلوق برمضان،و كاني رديت له من بعد طول غياب بأحد اطباقي المفضلة .

آنا نوعي وايد أجرب أسوي أطباق يديدة وحتى لو تلاقي الإستحسان ألقى نفسي أتكيسل أسويها مرة ثانية ، لكن هاللازانيا من اكثر الأطباق إلي كررتها و بنفس الوقت وايد تنطلب مني.

اللازانيا من الأطباق المفضلة و ذات الشعبية الكبيرة على مستوى العالم ، و مع هذا وايد ناس ما يعرفون يسوونها (من ضمنهم بيتنا) على الرغم من سهولتها.

اللازانيا تحضر بـ3 طرق (طبعاً أحنا هني نستثني لازانيا الخضار و اللازانيا الفنتق إلي على مشروم و سي فود و تشيكن ...إلخ) :

*لازانيا بولونيز : وهي من أكثر الانواع شعبية و من أكثر الأنواع إلي تحضر في المنازل ، تتكون من الصلصة الحمرا (صلصة اللحم) + شرايح اللازانيا + صلصة البشاميل إلي عادة ما يضاف لها جبنة البارميزان.

*كلاسيك لازانيا (إلي إنشاء الله راح نسويها) : نقدر نقول عنها إنها طريقة أهل نابولي في تحضير اللازانيا، بما ان نابولي هي مركز صناعة الأجبان راح نشوف إن اللازانيا عندهم تحتوي على نوعين من الاجبان (الريكوتا و المزرولا) ، وهي من الطرق إلي وايد تتحضر في المطاعم لأنها سهلة و ما تاخذ وقت.

*النوع الثالث يجمع ما بين البولونيز و الكلاسيك، يعني اللازانيا راح يكون فيها طبقات من شرايح اللازانيا+صلصة حمرا+جبنة ريكوتا و مزرولا+صلصة بشاميل .

ألحين نشوف شلون نسوي الكلاسيك لازانيا خطوة بخطوة :

هذي هي المكونات الرئيسية للكلاسيك لازانيا عبارة عن شرايح لازانيا (العدد حسب حجم القالب إلي راح نقدم فيه اللازانيا ، آنا إستخدمت 6 شرايح) +جبن مزرولا (راح نحتاج 3 جياس من الحجم الصغير ، عن نفسي أفضل ماركة بريزيدنت) + علبتين جبنة ريكوتا (تلقونها في مركز سلطان أو في ركن الذواقة في جمعية الشامية يمكن بعد تلقونها في كارفور)هذي الماركة إلي مستخدمتها إسمها فريغو يبيعون ريكوتا عادية و low fat و خالية الدسم ، نصيحة لا تاخذون خالية الدسم ترى طعمها إستغفرالله ما يترقع +لحم مفروم+صلصة باستا جاهزة (نحتاج حق غرشتين من الحجم الكبير، إختاروا الأنواع إلي يكون فيها ريحان basil و أوريغانو و بصل)

نبتدي بالسهل؟

يالله ...بسم الله الرحمن الرحيم

بمجرد ما نفتح علبة الريكوتا و نطلع الجبنة و نضيف لها ملح + فلفل اسود نكون خلصنا من أحد طبقات اللازانيا :))

لكن عن نفسي

أحب أضيف مع جبنة الريكوتا نص كوب بارميزان (علشان يعزز من طعم الجبن و يعطي ملوحة) و طبعاً إذا إستخدمنا البارميزان نستغني عن الملح + نص علبة كريما لأن جبنة الريكوتا مع الحرارة تصير وايد متماسكة فنحط لها كريما علشان ترخيها شوي و نتبلها بفلفل أسود.

خلصنا من الريكوتا ...

ألحين نييب الجدر و نحط فيه ماي و ملح و زيت ولما يغلي نضيف له اللازانيا

لما تستوي نطلعها ... ملاحظة ، لا إستوت اللازانيا حطوها بصينية عميقة فيها ماي حار و زيت علشان ما تلزق ببعضها.

ألحين نيي حق الصلصة الحمرا

نقطع بصلة متوسطة (مستواي تعيس في تقطيع البصل) + فصين ثوم و نخليهم على كتر

نحط اللحم في مشخال و نغسله زين

بالنسبة لي ما أحمسه مع البصل و الثوم على طول ، اول شي أحركه على نار هادية لما يطلع الماي و الدهن إلي فيه و أتخلص منه بعدين أحط له زيت +بصل و ثوم +ملح +فلفل أسود و أعلي النار شوي و أقلبه لما يستوي

أصب عليه نص كمية صلصة الباستا الجاهزة و أحركهم لما تتكثف الصلصة و تصير ثقيلة مثل ما نشوف في الصورة فوق

نضيف النص الثاني من صلصة الطماط ونحط ملعقة كبيرة من الأوريغانو و نخليهم على النار لما تصير الصلصة شوي حارة.

نييب الماعون و نحط بقاعته شوية صلصة طماط علشان ما تلصق اللازانيا

بعدين نصف اللازانيا (ما لكم شغل بالشكل ;q )

بعدين الريكوتا

و المزرولا

و الصلصة الحمرا

لازانيا

ريكوتا

مزرولا

صلصة حمرا

ألحين إنترس الصحن ... نرش جبنة المزرولا على الوجه مع كمية من الأوريغانو و ندخلها الفرن لمدة ساعة أو لما تسيح الجبنة ، نطلعها و نخليها مدة نص ساعة برة الفرن قبل التقديم لأنها راح تكون وايد حارة و الصلصة مايعة

يااااااااااااااااااااي أحب شكل الصلصة وهي متكتتة :))

أحلى جزء باللازانيا إلي يصير على زاوية الصحن تكون الصلصة متكتلة و طعمها شوي فيه حلاة ، أبوي و أخوي يخلطون الصلصة الباقية من اللازانيا مع عيش مشخول ، تيننننننننننننننننننننننننننننن :))

تصوير : mellow