السبت، ٥ سبتمبر ٢٠٠٩

classic lasagna


من زمااااااااااااااااااااااان عن المطبخ !! مو؟


:)


أذكر السنة إلي طافت إني فتحت هالبلوق برمضان،و كاني رديت له من بعد طول غياب بأحد اطباقي المفضلة .


آنا نوعي وايد أجرب أسوي أطباق يديدة وحتى لو تلاقي الإستحسان ألقى نفسي أتكيسل أسويها مرة ثانية ، لكن هاللازانيا من اكثر الأطباق إلي كررتها و بنفس الوقت وايد تنطلب مني.


اللازانيا من الأطباق المفضلة و ذات الشعبية الكبيرة على مستوى العالم ، و مع هذا وايد ناس ما يعرفون يسوونها (من ضمنهم بيتنا) على الرغم من سهولتها.

اللازانيا تحضر بـ3 طرق (طبعاً أحنا هني نستثني لازانيا الخضار و اللازانيا الفنتق إلي على مشروم و سي فود و تشيكن ...إلخ) :


*لازانيا بولونيز : وهي من أكثر الانواع شعبية و من أكثر الأنواع إلي تحضر في المنازل ، تتكون من الصلصة الحمرا (صلصة اللحم) + شرايح اللازانيا + صلصة البشاميل إلي عادة ما يضاف لها جبنة البارميزان.


*كلاسيك لازانيا (إلي إنشاء الله راح نسويها) : نقدر نقول عنها إنها طريقة أهل نابولي في تحضير اللازانيا، بما ان نابولي هي مركز صناعة الأجبان راح نشوف إن اللازانيا عندهم تحتوي على نوعين من الاجبان (الريكوتا و المزرولا) ، وهي من الطرق إلي وايد تتحضر في المطاعم لأنها سهلة و ما تاخذ وقت.


*النوع الثالث يجمع ما بين البولونيز و الكلاسيك، يعني اللازانيا راح يكون فيها طبقات من شرايح اللازانيا+صلصة حمرا+جبنة ريكوتا و مزرولا+صلصة بشاميل .


ألحين نشوف شلون نسوي الكلاسيك لازانيا خطوة بخطوة :






هذي هي المكونات الرئيسية للكلاسيك لازانيا عبارة عن شرايح لازانيا (العدد حسب حجم القالب إلي راح نقدم فيه اللازانيا ، آنا إستخدمت 6 شرايح) +جبن مزرولا (راح نحتاج 3 جياس من الحجم الصغير ، عن نفسي أفضل ماركة بريزيدنت) + علبتين جبنة ريكوتا (تلقونها في مركز سلطان أو في ركن الذواقة في جمعية الشامية يمكن بعد تلقونها في كارفور)هذي الماركة إلي مستخدمتها إسمها فريغو يبيعون ريكوتا عادية و low fat و خالية الدسم ، نصيحة لا تاخذون خالية الدسم ترى طعمها إستغفرالله ما يترقع +لحم مفروم+صلصة باستا جاهزة (نحتاج حق غرشتين من الحجم الكبير، إختاروا الأنواع إلي يكون فيها ريحان basil و أوريغانو و بصل)


نبتدي بالسهل؟


يالله ...بسم الله الرحمن الرحيم




بمجرد ما نفتح علبة الريكوتا و نطلع الجبنة و نضيف لها ملح + فلفل اسود نكون خلصنا من أحد طبقات اللازانيا :))


لكن عن نفسي





أحب أضيف مع جبنة الريكوتا نص كوب بارميزان (علشان يعزز من طعم الجبن و يعطي ملوحة) و طبعاً إذا إستخدمنا البارميزان نستغني عن الملح + نص علبة كريما لأن جبنة الريكوتا مع الحرارة تصير وايد متماسكة فنحط لها كريما علشان ترخيها شوي و نتبلها بفلفل أسود.


خلصنا من الريكوتا ...


ألحين نييب الجدر و نحط فيه ماي و ملح و زيت ولما يغلي نضيف له اللازانيا






لما تستوي نطلعها ... ملاحظة ، لا إستوت اللازانيا حطوها بصينية عميقة فيها ماي حار و زيت علشان ما تلزق ببعضها.


ألحين نيي حق الصلصة الحمرا





نقطع بصلة متوسطة (مستواي تعيس في تقطيع البصل) + فصين ثوم و نخليهم على كتر


نحط اللحم في مشخال و نغسله زين


بالنسبة لي ما أحمسه مع البصل و الثوم على طول ، اول شي أحركه على نار هادية لما يطلع الماي و الدهن إلي فيه و أتخلص منه بعدين أحط له زيت +بصل و ثوم +ملح +فلفل أسود و أعلي النار شوي و أقلبه لما يستوي




أصب عليه نص كمية صلصة الباستا الجاهزة و أحركهم لما تتكثف الصلصة و تصير ثقيلة مثل ما نشوف في الصورة فوق




نضيف النص الثاني من صلصة الطماط ونحط ملعقة كبيرة من الأوريغانو و نخليهم على النار لما تصير الصلصة شوي حارة.




نييب الماعون و نحط بقاعته شوية صلصة طماط علشان ما تلصق اللازانيا





بعدين نصف اللازانيا (ما لكم شغل بالشكل ;q )






بعدين الريكوتا


و المزرولا


و الصلصة الحمرا




لازانيا






ريكوتا






مزرولا





صلصة حمرا



ألحين إنترس الصحن ... نرش جبنة المزرولا على الوجه مع كمية من الأوريغانو و ندخلها الفرن لمدة ساعة أو لما تسيح الجبنة ، نطلعها و نخليها مدة نص ساعة برة الفرن قبل التقديم لأنها راح تكون وايد حارة و الصلصة مايعة








يااااااااااااااااااااي أحب شكل الصلصة وهي متكتتة :))
أحلى جزء باللازانيا إلي يصير على زاوية الصحن تكون الصلصة متكتلة و طعمها شوي فيه حلاة ، أبوي و أخوي يخلطون الصلصة الباقية من اللازانيا مع عيش مشخول ، تيننننننننننننننننننننننننننننن :))
تصوير : mellow

هناك ١٧ تعليقًا:

Sweet Revenge يقول...

اممممم تسلم الايادي , وانا شفته وانا صايمة وااااي شكلها يشوق
:)

chandal/danchal!! يقول...

بالعافية


شكلها عجيب وريتشي ريتش... اموت عليها وأول سؤال بمطاعم اسبانيا الدايخة

lasagna ternera o cerdo?

no.. cerdo

:(

ونحول على بيتزا فيجيتال


عندي نفس الباستا سوس اللي عندج (خوش نوع)... جربي موزورولا ماركة كرافت من سلطان وايد لذيذة بس العادية مو اكسترا كالسيوم!


يعطيج الف عافية يا ميلو... راح نجربها وتييج الاخبار الطيبة

:)

mellow يقول...

سويتي

دخول المدونة بعد الفطور لو سمحتوا ...أي تهور من ناحيتكم ما أتحمله.


حياج حبيبتي

:))

mellow يقول...

جندولا

صج؟!! بتدخلين المطبخ علشان تجربينها؟!! الحمدلله الله هداج :)))

إهيا بالضبط ريتشي ريتش

الصلصة الأصلية يكون اللحم فيها نصه بيف و نصه إتاليان سوسج يعني لازم فيه pork

إن شاء الله أجرب ماركة كرافت ، ماركة برزيدنت أحبها لأنها لا ذابت تغطيتها وايد وايد حلوة.

الصلصة كنت أول مرة أجربها وطلعت وايد لذيذة ، في صلصة بريغو بعد وايد حلوة.


يالله ناطرينج تجربينها :))

الأستاذ حمام يقول...

تبين تفطرينا؟

ابداع.. وماعليج امر طرشي لنا البيت.. عادي نستقبل لزانيا بالفطور :)

تسلم ايدج

نون النساء يقول...

احس راح امتنع عن الأكل عقب ما أكلها يومين
من شدة الشبع

هههههههههه

شكلها لذييييييييييذ



يسلمو الأيادي

ARTFUL يقول...
أزال المؤلف هذا التعليق.
ARTFUL يقول...
أزال المؤلف هذا التعليق.
mellow يقول...

أستاذ حمام

أبي أفطركم؟
تقريباً ... بس مو آنا إلي أتحمل الإثم
:))

وين تبيني أدز لك إياها؟

على سرايا مراد باشا؟

mellow يقول...

نون النسوة

لوووووووول إشدعوة
بس صج إهيا تشبع ... مرة دخلت بسويها جان يقول أبوي حق الخدامة لا تسوين غدا اليوم ...لأنها صج إهيا بروحها كافية

mellow يقول...

آرتفل

لووووووووووووووووول واي ضحكتني

عادي حتى لو تطلع مو حلوة كفاية دخولك المطبخ راح يكون محل تقدير عند المدام ...بس لا تخاف إن شاء الله تطلع لذيذة.

اللحم العلبة الكاملة فيها نص كيلو
آنا أحط العلبة كلها.

بالنسبة للصلصة...إي أول شي تحط غرشة كاملة مع اللحم و تخليها تطبخ لما ينشف مايها شوي تصير ثقيلة بعدين تحط الغرشة الثانية و تحط معاها أوريغانو.

بالتوفيق إن شاء الله
:)

ولاّدة سابقاً ... رانيا السعد ...رانية المنيفي حسب الأوراق الرسمية يقول...

ممكن أضيف إضافة دعالة

أنا ما أحب الصوص الجاهز
ممكن تحضير صلصة طماط إيطالية طازجة بمنتهى السهولة

طماط مقشر معلب - السبب أن لونه أكثر حمرة من الطازج
زيت زيتون
فص ثوم
جزر مقطع شرائح كبيرة
سالاري مقطع شارئح كبيرة


أول الزيت مع الثوم وبعدين الطماط وشوية ماء..والجزر والسالاري وتغطي الصلصة وتترك على النار لمدة عشرين دقيقة ومن ثم تتم إزالة الجزر والسالاري ويضاف الاوريغانو

وشكراً على الوصفة

mellow يقول...

يا هلا فيج ولادة

أبداً أبداً إضافتج وايد حلوة
الجزر و السالاري من المواد العطرية إلي "تطير زفرة اللحم" ...بس آنا تكيسلت يوم إني لقيت الجاهز :)

مشكورة حبيبتي على إضافتج
أسعدني مرورج
:)

ميمة السبيت يقول...

** صج شكلها يشوق انشالله نشتري المقادير و نسويها حق السحور مشكورة و تسلم ايدج :)

** ترى اكلج يشوق

ARTFUL يقول...

هياااااااااااااااااااااااا

سويتها

وطلعت نااااااااااااااااار وفظييييعه الكل حبها ومحد مصدق اني مسويها الا لما شافوا صورتي


انزين عندي اسئله

في جم قطعه من الباستا تقطعوا معاي؟

حطيتها بالفرن أقل من ساعه!!


رجاءا لحد يضحك

p;

mellow يقول...

ميمة السبيت

سويها ماكو أسهل منها و إذا بتسوونها حق السحور بتقعدون 3 ما تفطرون :q لأنها تشبع

**مشكورة حبيبتي و آسفة على التاخر بالرد

mellow يقول...

آرتفل
صج؟!!
إنجحت؟!!
هيااااااااااااا :)))

لووووووووووول أهم شي إنك مصور نفسك

عادي عادي خلها تتنتف خو إهيا أول و تالي بالتنتف :)

مو مشكلة أقل من ساعة المهم إن الجبن يسيح.

إستانست على تجربتك الناجحة :)))