السبت، ١٠ أكتوبر ٢٠٠٩

julie`s julia .. and my nigella





بعدي ما شفت الفيلم لكن قاعدة انطره ينزل على أحر من جمر ، على حد علمي المتواضع هذا أول فيلم يسوونه عن مدون "أو بالاحرى مدوِّنة" ، وهي المدوِّنة جولي باول صاحبة مدونة جولي آند جوليا.
يحكي الفيلم قصتين حقيقتين عن إمرأتين يفرقهما الزمان و المكان لكن جمعهما حب الطبخ.
جولي باول موظفة بسيطة من نيويورك حست إن حياتها باهتة فحطت لنفسها هدف وهو إنها تألف كتاب يحكي قصتها و محاولاتها لإنقاذ زواجها و إيجاد حلمها و إنعاش روحها عن طريق تطبيقها لكل وصفات جوليا تشايلد صاحبة برنامج bon appetit المتخصص في الطبخ الفرنسي













و صاحبة كتاب mastering the art of french cooking








وفي سنة 2002 إفتحت جولي باولز بلوق تكتب فيه يومياتها مع الطبخ و يومياتها مع تحضير كتابها إلى أن أصبح هذا البلوق من أكثر المدونات متابعة، وفي عام 2005 أنهت كتابها julie and julia :my year of cooking dangerously.



(لاحظوا ... كتكوتي دخل التاريخ :) ... حلاته)



الجدير بالذكر أن جوليا تشايلد ما تعلمت الطبخ إلا بمرحلة متأخرة من عمرها (كان عمرها 37 سنة يوم دخلت مدرسة الطبخ) حتى يوم كانت صغيرة ما شافت أمها تطبخ لأن كان عندهم طباخ(أو طباخة).و في عام 1951 بعد ما أتمت تعليمها في مدرسة الطبخ في باريس لمدة 4 سنوات ، بدت جوليا تشايلد مع 2 من صديقاتها بتعليم الطبخ و إفتتحوا مدرسة إسمها. École des trois gourmandes


يوم قريت قصة الفيلم قعدت أفكر ساعتها ، لو آنا مكان جولي باول، و أبي أسوي نفسها وأطبق وصفات شيف معين كل يوم و لمدة سنة كاملة ، فأي شيف راح أختار مكان جوليا تشايلد؟
بالتأكيد راح تكون الرائعة نايجيلا لاوسن.











هالمرا أحبها !!
إضافة إلى وصفاتها إلي ما قط مرة خابت ، كلامها و لهجتها الإنجليزية الهادئة و نبرة صوتها المطمئنة و نصائحها " الأختوية" و روح "ربة المنزل" إلي تشع منها وجمال ملامحها ،كل هالعوامل كانت كفيلة إن تامن لها قاعدة جماهيرية كبيرة .



هذي بعض الاطباق إلي تعلمتها من نايجلا لاوسن ، أدخلت فيها بعض التغييرات ، بس بالأخير it turned out to be a hit :))



chicken pot pie




من سلسلة نايجلا إكسبرس للوصفات السهلة و السريعة ...هذا الفيديو يبين شلون سوتها نايجلا و تحتها بكتب شلون آنا سويتها







المقادير:



شرائح سلامي (إستخدمت السلامي بدال البيف بيكن أولاً لأنه موجود بالجمعية مالي خلق أطق درب لين مركز سلطان و بعدين لأن السلامي فيه بهارات أكثر و دهون أقل)

مشروم فريش (نص العلبة)

فليهات دياي مقطعة شرائح

مكعبين ماجي خضار مذوبين بكوب ماي (ماكان عندي بالثلاجة مكعبات دياي ، إذا بتستخدمون إلي على دياي إستخدموا واحد بس لأن ملوحته أكثر من إلي على خضار)

طحين

ملعقة صغيرة زعتر ناشف (ممكن إضافة أعشاب أخرى مثل الروزميري أو الـsage "المرامية" أو الأوريغانو)

عجينة بف باستري جاهزة

الطريقة:

حطيت الجدر على الجولة و خليته شوي يسخن بعدين قصصت السلامي (بالمقص مثل ما سوت نايجلا) و شوحته على النار (بدون زيت) لما تحمش.

قصصت المشروم و ضفته للسلامي و قلبته شوي .

نغمس الدياي بالطحين و الأعشاب و نضيفه للباجي بالجدر و نقلبه على النار بعدين نصب فوقه الماجي و نتركهم يطبخون ، بهالوقت أزهب البف باستري (آنا العجينة إلي عندي كانت متينة إضطريت إني أقصصها شرايح و أرقها شوي) بعدين مثل ماهو موضح بالفيديو نقص جزء من العجينة على شكل شرايح و نلزقها على حاشية القالب و الجزء الباجي من العجينة نقصه على شكل دوائر و نخليها حق بعدين.

نزيد الماي لخلطة الدياي و المشروم و نخليها على النار شوي لما تتسبك (إذا طلعت الزفرة نشيلها) ، نزهب الفرن و نسخنه على درجة حرارة 200.

ألحين نصب خلطة الدياي بالقوالب و نحرص إن ما نترس القالب لي الأخير ، بعدين نغطي وجه القوالب بالدوائر إلي سوينها من البف باستري و نقظظ العجينة بالشوكة و نحط القوالب بالفرن و نخليهم لما تتحمر العجينة


ناكل الطبق مثل طريقة أكل نايجلا :))

:lamb cutlets







إهيه حاطه معاه زيتون و فلفل أحمر حار آنا شلتهم و قدمت اللحم مع mashed potato و زدت كمية الصلصة شوي إذا تبون الطريقة الأصلية ضغطوا هني :


المقادير: كيلو ريش غنم - 3 فصوص ثوم مقطعين شرايح - بصلة صغيرة مبشورة- عصير ليمونة واحدة + نصف ملعقة طعام من بشر قشر الليمون - 4 إلى 6 ملاعق طعام زيت زيتون - أوريغانو - ملعقتين صغار مسترد (يفضل ماسترد ديجون).


- نشيل الشحم على قدر المستطاع من العظام (نقصه بسكين أو مقص قوي) بعدين نحط الريش داخل جيس نايلون (ممكن نستخدم جيس الفريزر) و نطرق اللحم (بالهاون أو بمطرقة خاصة) إلى أن تقل سماكته.


-نسوي تتبيلة من باقي المقادير و نخلي اللحم يتتبل لمدة 20 دقيقة إلى ساعة.


- نحط شوية زيت بالمقلاة و بعدين نشيل التتبيلة من اللحم (نسلتها بالسكين و نحتفظ بالتتبيلة ما نقطها) و نحمر الريش على الوجهين ( المقلة يمكن ما راح تكفي فناخذ 3 قطع و نخليهم لما يستوون بعدين نشيلهم و نحط 3 ثانيين و هكذا).


- ألحين نجمع قطع الريش المستوية كلها نحطها بالمقلاة و نحط فوقها ملعقتين كبار من التتبيلة و نغطي اللحم بالماي (كوب و نص) و نخليه يطبخ لمدة 5إلى 7 دقايق.


- نشيل اللحم و نصفه بصحن التقديم ، أما الصلصة فنضيف لها خليط مكون من ملعقتين كبار طحين مذوبين بشوية ماي و نخليها على النار لما تصير شوي ثقيلة.





-نصب الصلصة فوق اللحم و يتقدم الطبق مع الmashed potato.

طريقة عمل الـmashed potato :


3 حبات بطاط متوسطة الحجم - فص ثوم صغير مهروس- ملح+فلفل أسود - ربع كوب حليب+ربع كوب كريما.

نسلق البطاط بقشرته إلى ان يلين بعدين نتركه يبرد شوي و نشيل عنه القشر و نهرسه بظهر شوكة.

نضيف له باقي المقادير و نخلطهم مع بعض زين.





تصوير : mellow

هناك ٥٠ تعليقًا:

Sweet Revenge يقول...

صباح النشاط والانتعاش ميلو تصدقين مع ان احب الافلام بس يوم قريت قصته ماشدتني قلت شكو فلم عن الطباخ بس شوقتيني له .
اما طباخج ماشاء الله شنو جولي شنو جوليا احنا عندنا ميلو وبس

aL-NooR . يقول...

احب نايجيلا لاوسن ..استــــــانس عليها ..حلوة و صاجة حتى صوتها تحسينه حميم p; بس يبيلي اشوف الفلم شوقتيني ..

اكيـد مو انتي البطلة
p;
صبــــــاح الاطباق الحلوة ..اشوة اني منو صايمة ..و التصويـــــر عجيب ما شاء الله ..

*************************

ARTFUL يقول...

اذا نزل قوليلنا لا تنسين!!!

ميلو جم وزنج؟؟

p;

mellow يقول...

سويتييييييي

مالي خلق نشاط و إنتعاش ... أبي سبا تايم و مساج ...أو على الأقل أرد البيت أنام.

إي إنتي ما تحبين الطبخ علشان جذي ما شدج ;q

ما شفته بس قريت عنه تقارير ، النقاد وايد معطينه تقديرات عالية ، بس والله شكله خف طينة يضحك .. إنتي الله يخليج شفتي جوليا الصجية شلون مسطرة الدياي جدامها علشان ياخذ صورة جماعية؟!! أمبيه أنتيكه

تهقين أسوي فيلم؟

chandal/danchal!! يقول...

والله زين تقدرين تركزين بالطبخ مع هالمزيونة


عيزنا واحنا ننطر الفيلم

وبانتظار كتابج

:)

mellow يقول...

صباح "النـــور"

:))

نايجيلا تهبل ... حتى(الشيرة) إلي نستخدمها حق اللقيمات و الحلويات العربية متعلمتها منها ، أول كلش كلش ما تضبط معاي.

على حد علمي مو آنا البطلة :)

إذا نزل الفيلم و ما عجبكم مو تبلشوني ...ترى حتى آنا ليلحين ما شفته بس قصة تشوق.

مشكورة حياتي من ذوقج

نون النساء يقول...

^
^
^

ترا بلاغة اشلف مو زييينة هههههههههه





وااي نايجلا شفتلها عدة حلقات على فتافيت
أهد طبختها واقعد اطالعها لما تسولف ..




ميرسي بوكو

mellow يقول...

آرتفل

لوووووووووووووووووووووووووووووووووووووووووووووووووول

عليك أسئلة!!
وزني يزيد بس بحياتي ما صرت متينة (ما أعطي لنفسي مجال إن هالشي يصير) ،

حالياً ماسكة نفسي لأن ألحين موسم حفلات فالأكل إلي أسويه أخلي بيتنا ياكلونه أو إني أدزه نقصة.

أما إني أسوي وصفات صحية ... إنسى ... ما أحب الأكل الصحي.

mellow يقول...

جندولاااااا

أي مزيونة فيهم تقصدين؟ جوليا ولا نايجيلا ؟ ;qdq

تصدقين توني أدري إن نايجيلا عمرها 50 سنة؟

طاعي جوليا تشايلد ترى يوم طلعت بالتلفزيون كانت نفس عمرها بس شلون شكلها متهردق!!

أنزل كتاب و أييب مخرج و منتج يسوون فيلم عن قصة حياتي و البطلة منو تهقين ؟

شيماء علي بالحجاب تنفع؟
:q

mellow يقول...

نون النسوة

لوووووووووووووووووووووووووووووووووووووووووووووووووووووول لا إنتي شوفي تعليقه و طاعي ردي إشطوله...صج موضوع حساس ، لأني أحب الأكل و بيتنا (الحمدلله ياربي) ما يخلوني على راحتي، ولا آنا لو أهد نفسي جان علوم.

أما نايجيلا ... أنصحج تركزين على طبختها لأن طباخها عجيب :))

bent el deera يقول...

صباح الورد يا ام البوستات السنعه :>

صراحه هالفيلم وايد شادني بعد وودي اشوفه وناطرته ينزل عندنا دي في دي :>

نايجيلا تينن واستانس عليها لما تشرح وتغازل الاكل تخليني ودي اطب معاها... احسها تحب الاكل وهالحب مترجم بتصرفاتها

احب ديلا لانها تاسس صح وتشرح كل خطوه..احسها خوش ابله وودي اخذ كورس عندها نبره صوتها الهاديه وشرحها الدقيق لكل خطوه وتاثيرها على مجمل الطبخه يعطيني احساس انها بيوم من الايام كانت مدرسه او ناظره مدرسه هههه.. احسها الانجلش فيرجن من مارثا ستيوارت بس هذيك على حرفنه اكثر :>

جيمي اوليفر... حدي استانس عليه وعلى تخبيصاته احسه ياهل بقالب ريال.. يعجبني فيه انه ماكو حدودو معاه لكل ... يقرب الشرق والغرب بطبق واحد ... تاثير المدرسه الايطاليه واضح عليه بس هذا ما يمنع انه يجرب اشياء يديده واغلب اللي جربته منه ناجح بشكل حلو

والقائمه تطول وتطول

بس تبين الصج ما اشوف روحي محكوره بشيف او كتاب طبخ معين :>

هههه مادري ليش لما بسولف معاج اشوف تعليقاتي دايما هالطول هههه

سامحيني على القرقه
باي ذا واي ... اليوم غدانا لزانيتج سويتها وان شاء الله لي رديت من الدوام بصورها وبحطها بالبلوق :>

chandal/danchal!! يقول...

LOL

لأ هيا الشعيبي أخف طينة وعقلها بتنجاني

شفتيها بجولة ونقوله ما حصة اللوغاني!... كلش ما استغربت تعلقها الشديد بالبيديان!

bent el deera يقول...

تصحيح .. اللي صج صج صج ودي اعرف كل وصفاتها باسرارها امي الله يرحمها

امي الله يرحمها كانت شيف بالفطره وللاسف اغلب وصفاتها انتقلت معاها خاصه ان بنتها ذيك الحزه كانت يالله تعلم الف باء المطبخ (( واقصد روحي بهالحجي ))

mellow يقول...

بنت الديرة

القلوب و الجدور و المطابخ و الأفران عند بعضها .. تكلمي على قد ما الله يقدرج.

تصدقين آنا أثق بالإنجليز في التعليم أكثر من غيرهم من باجي الجنسيات و خاصة بالطبخ.
يعني جيمي أوليفر صج إنه وسخ و نص المقادير ياكلها قبل لا يبدي بالطبخة ، بس شاطر.

مارثا ستيوارت صج تعطي مثال شلون ست البيت ممكن تكون بزنس وومن و مهارتها بس أعمالها المنزلية ، بس بالطبخ شوي لج عليها ، لما أزور قسم الطبخ في موقعها ألقى وايد تعليقات من الناس إن الطبخة ما اضبطت معاهم ، عكس نايجيلا مقاديرها "ما تخرش الميه" روحي فوود نت وورك و شوفي دايما أطباقها يا معطينها تقييم خمس نجوم أو أقل شي 4 نجوم من أصل خمسة.
و بعدين تهبل ... أول شي طبيعية (ولا لما تشرح حبها للأكل) ثانيا جميلة .. أستانس أشوف ويهها.
*************
جربي اللازانيا و قولي لي ... آنا قاعدة أطالع الفريكة (أبوي يحب هالسوالف) إنزين بسئلج ما يبيعون فريكة بالمطحنة الدولية؟ لأنها قريبة منا.

mellow يقول...

جندولا

لوووووووووووووووووووووووووووووووووووووووووووووووووووووووووووول الله يغربل إبليس ضحكتيني.
قاعدة أطقطق على الكمبيوتر و أضحك و البنات إلي معاي كل ساعة مطالعيني.

لأ البرنامج بكبره ما شفته بس ودي أدور حلقتها على اليوتيوب جود ألقاها.

لا لا هيا الشعيبي pas chic ، عيل منو أختار؟ ياربي ما عندنا ممثلات سنعين.

mellow يقول...

بنت الديرة

الله يرحمها و يغمد روحها الجنة و إنتي فيج الخير و البركة إن شاء الله ، تصدقين اليوم قاعدة أتذكر عمتي و يدتي و كل الحريم إلي ينضرب المثل في طباخهم ، إن المفروض هالحريم الكبار يوثقون كل طبخاتهم (من صجي أتكلم) لأن هذا تراث و ثقافة حرام يندثر.

لأن بين الفترة و الثانية أسوي بحث عن الأكلات الكويتية ، و صدقيني أحتر أحتر لما أسوي سيرج بالنت و تطلع لي بالمنتديات أكلات زوراً و بهتاناً يسمونها كويتية ... عيل المجبوس يحطون معاه فلفل أخضر و جزر و بيديان؟
ولا الحشو يحطون فيه جزر و مشروم؟

عندي كتاب "المطبخ الكويتي" مال نورة النشمي بس للأسف طريقة كتابة الوصفة و المقادير مو واضحة.

bent el deera يقول...

عدل كلامج مارثا انا ما اشوفها فلته بالمطبخ وانا جربت كذا شغله منها وبائت بالفشل الذريع اولهم الكوكيز واخر شي الميت لوف اللي صار تفتت عندي وصار خبيصه
صح ظلم اني اشبه ديلا فيها بس قصدي نفس تون صوتها نفس طريقه شرحها للخطوات

جيمي شطانته شطانه يهال ... جربي وصفاته ترا ناس حلوه ... انا ادش موقعه واطبق وعندي 3 كتبه :>


بالنسبه للفريكه ... عوافي مقدما :>... الفريكه تحصلينها باي مكان اتوقع تحصلينها بالمطحنه الدوليه وحتى بجمعيتكم... امس كنت بسلطان شرق عشان اشتري عده اللزانيا وشفت فريكا خشنه سوريه وشكلها احسن من اللي كنت اخذتها من سمراء عدن

بس وخري وخري عن الماركه الفاشله اللي استخدمتها

mellow يقول...

بنت الديرة

والله ما خطر على بالي أدش سايت جيمي أوليفر ... بدشه ألحين إن شاء الله.

الكوكيز خذيته من موقع allrecipe و ضبط (أحب هالسايت)

ولا يهمج ...الماركة إلي إستخدمتيها بعلق أوراق و بخزنها بالريمايندر و بكتيها على إيدي علشان ما أنسى :))

من له خلق ينظف

bent el deera يقول...

صح صح كلامج... انا كنت احوس وتطلع عيني لما ادور وصفه تراثيه... كتاب فاطمه حسين بعد من غير مقادير ثابته وكتاب افنان الزياني مال الاكلات الخليجيه اغلب الوصفات عراقيه منقوله من كتاب ثاني

ويدتي الله يطول عمرها معتزله الطبخ من زمان فاغلب الوصفات ما تذكرها او تنسى تعطيني المقادير الكامله وتعالي شوفي التخبيص

الحين ما شاء الله كتب الطبخ فيها على الاقل وصفه من وصفاتنا وهالشي حلو وان شاء الله تطلع كتب متخصصه بالاكل الكويتي العتيج

المنتديات وايد علمتني وبعض الكتب و جزء من اهلنا وجزء من التجربه والخطا والحمدالله

عشان جذي اول ما بديت احط وصفات ببلوقي حطيت وصفاتنا مثل ما تعلمتها ونحجت معاي لاني ادري في وايد غيري يبون يتعلمون هالشي :>

اللزانيا مبين عليها تينن دعيتلج وانا اخلط مكوناتها قبل لا اذوقها..تصدقين وانا اسويها كانت ريحه المطبخ كلها شي لذيذ... باجي بس تحميره الفرن .. اقولج تسلم ايدج مقدما ودام اني ماخذتها منج اكيد بتطلع حلوه :>

bent el deera يقول...

ايي شفتها اللي موقع اول رسبيز ونفسهاالموجوده على موقع نستله او بالجيس نفسه .. انا بس ازيدها شكر اسمر واقلل الابيض عشان تصير تشوي اكثر واغير الزبده بشورتننغ عشان ما تسيح معاي :>

تصدقين انا احب هالموقع واغلب المواقع الاجنبيه اقعد اقرا التعليقات قبل الوصفه... احس فيها مصداقيه اكثر منتدياتنا.. اللي يرفعون الوصفه وما يبقى حجي ما ينقال واذا جربتها تطلع عاديه جدا اكيد مساله الذوق تفرق بس لما تشوفين 20 او 30 وحده تمدح وتتفاجائين بالطعم احط !!!!!

mellow يقول...

بنت الديرة

أول شي عليكم بالعافية مقدماً و إن شاء الله إن شاء الله تعجبكم و ماتفشلني.

المنتديات تطلعين منها بشي و تلقين من ضمن المواضيع وحدة تييب مقادير طبخة عتيجة و أصلية ..بس إلي أقصده إن في بوادر إن أكلنا تتغير ملامحه ... طبعاً الطبخة الوحدة تختلف من بيت لين بيت بنوعية البهارات أو طريقة تنظيف الإيدام (شلون تشيلين منه الزفرة) أو مثلا شي تقلينه و شي تمسحينه بالزيت و تدخلينه الفرن أو أو أو... طريقة التحضير تختلف بس مو المكونات الأساسية...ألحين بدينا نشوف طبخات أول مرة نتعرف عليها بس بأسماء قديمة.

الكوكيز دايماً أزيد الشكر الأسمر (أمي وايد تحب الكوكيز إلي أسويه) ، و التعليقات بالمواقع وايد تهمني ، بس إذا شفت كل التعليقات إيجابية أبتدي أشك ، بس لما أشوف من بينهم ناس تعليقاتهم إيجابية بس يقولون إنهم غيروا شوي بالمقادير هذيله أصدقهم و وايد أستفيد من إضافاتهم و أبتدي أثق بالـrecipe أكثر

ARTFUL يقول...

لا تعلمين احد

ناوي اسوي الطبق حق بيتنا

p;

mellow يقول...

آرتفل

أي واحد ؟ الدياي ولا اللحم؟

سواء هذا أو ذاك أنصحك تشتري أعشاب مجففة و تحط رشة(نص قفشة صغيرة) من كل نوع ...إلا الأوريغانو على كثر ما تحط منه ما يطلع الأكل مر فإخذ راحتك و إنت تحطه

بيتكم ما استغربوا هوايتك اليديدة؟
ولا إنت من زمان تطبخ؟

lazy dazy يقول...

تسلم الايادي طبخاتك اتشوق .. مشكورة على الوصفات

mellow يقول...

lazy dazy
إسمج يونس :))

مشكورة حبيبتي ...حياج الله

ARTFUL يقول...

طالع تقول تعرف تطبخ

احترمي نفسج لو سمحتي


انا محد يصك علي بالبيض

p;

----------

لا والله هوايه يديهبس للامانه من زمان ودي اصير طياخ وكل ما اشوف فيلم عن طباخ والا شيف أستخف ولا لما شفت رتاتيولي

p;

انزين لا توهقينا أي أعشاب ومن وين أيبها!! لا ناوي اسوي ستيك الريش

:)

mellow يقول...

آرتفل
مي سوري مي سوري إلي ما يعرف الصقر يسويه إسكالوب ;q حقك علينا.

بالنسبة للأعشاب ذاك اليوم بنت الديرة نزلت بوست عن طريقة دياي مشوي و متبلته بخلطة أعشاب (بروفانس) شاريتهم من دين آند ديلوكا هذيله مخلوطين و خالصين تاخذ منهم نص قفشة كبيرة و تحطهم مع التتبيلة أو تقدر تاخذ من الجمعية زعتر ناشف و روزميري ناشف (يسمونه إكليل الجبل أو حصى البان) أو تاخذ لك من مركز سلطان يبعونهم بغراش صغار إخذ لك:
rosemary (إكليل الجبل)
thyme (زعتر)
marjoram (مرقدوش)
tarragon (طرخون)

حط رشة (نص أو حتى ربع قفشة صغيرة) من كل نوع بس الروزميري خله أكثر شوي يعني قفشة صغيرة كاملة.

لا تنسى تطقطق اللحم بالهاون (أو حتى بقاعة غرشة مربى ولا غرشة زيت المهم شي ثقيل) علشان يفرش معاك اللحم و تصير سماكته أقل فيستوي بسرعة.

وقبل لا تحطه بالمقله شيل منه التتبيلة مو تحطه وهو يرجخ.

mellow يقول...

هذا بوست بنت الديرة إلي فيه الأعشاب
http://aklati.blogspot.com/2009/10/blog-post.html

ARTFUL يقول...

يسلموووووووووووووووووووو

هالسوالف احطها مع التتبيله عدل؟!؟!

من الحين احس اني راح أضبطها

p;

ARTFUL يقول...

ميلو المرقدوش جني خابره ينشرب!؟!؟!

mellow يقول...

آرتفل
آسفة على التأخر بالرد

إي ...الأعشاب تحطهم بالتتبيلة .. المرقدوش العشبة نفسها مو ماي المرقدوش..شكلها فيه شبه من الأوريغانو.

بس إنت إذا عندك روزميري و زعتر ناشف كافي و هذيله إن شاء الله تلقاهم بالجمعيات.

الطريقة تقدر تسويها على ستيكات بدال الريش.

إن شاء الله تضبط معاك :)

fatto يقول...

صباح الخير ميلو .. مس يو والله :)

الحين الساعه 9:30 الصبح .. خليتيني اشتهي هاللحم .. في احد يشتهي لحم هالحزه !!!! لاتلوميني الصراحه يششششششوووووق .. يعطيج الف عافيه وتسلم ادياتج :)

ميمة السبيت يقول...

** واااي انا بالدوام و طاقني اليوع و غدانا مليق :(

شالحل ؟

mellow يقول...

فاتو

حبيبتي صبحج الله بالخير

عادي عااااااااااااادي تييني هالحالات بس أستحي أقول حق أحد

مادري ليش اللحم و البيض أستحي أعبر عن حبي لهم :q

حياج الله حبيبتي

mellow يقول...

ميمة السبيت

إستغفرالله ياربي يا كره هالشعور تقولين حق الخدم يسوون أي شي حق الغدا علشان تفتكين من حنتهم و بالأخير تتحسفين.

أقول

آنا توظفت آخر سنة 2004 مادري إذا مثبتتج ولا لأ ، عاد آنا هالأربعا(إن شاء الله باجر) راح اكون بإذن الله بالخالدية ، حق الأيام التوعوية إذا تذكرينها;)جان زين نشوفج

ARTFUL يقول...

ميلوووووووووووووووووووو

لحقييينيييييي

تعالي ما نحط لا فلفل اسود على اللحم لما انتبله ولا ملح؟

الشغله الثانيه

الصلصه اللي انضيف عليها طحين مذوب بماي الي بالبايركس والا اللي بالمقله اللي تونا حطينا اللحك فيه مع كوب ونص ماي؟؟

انزين التتبيله ماهي ليكويد صح؟

الله يستر

mellow يقول...

أرتفل

حط ملح و فلفل أسود حسب الرغبة

الطحين و الماي تحطهم بالأخير و الصلصة بالمقلة ...و تكون ساعتها الصلصة ليكويد بس لما تحط عليها خلطة الطحين تثقل

mellow يقول...

الله يسهل إن شاء الله

أحلى ما بالموضوع إنك قاعد تدور علي من مدونة لين مدونة
:q

مرة ثانية

تاخذ قفشتين من التتبيلة و تحطهم بالمقلة مع اللحم و تزيدهم ماي و تخليه شوي يطبخ بعدين تزيدهم من خلطة الطحين مع الماي علشان شوي تثقل

bent el deera يقول...
أزال المؤلف هذا التعليق.
ARTFUL يقول...

متشكرين يا معلمة

:)


لا خلا ولا عدم

mellow يقول...

آرتفل

أبيك توافيني بآخر التطورات

قمت احاتي

ARTFUL يقول...

انا خايف قعدت اشهي مرتي اسبوعين وآخر شي تطلع مو لي هناك

سواد ويه

انزين صج الحين انا متبلهم والليله بسوي الطبخه بس ميله التتبيله ماهي ليكويد ،، انا حاط في بالي لازم تكون ليكويد .. عسى انا غلطان؟؟

mellow يقول...

التتبيلة مو ليكويد

بس تاخذ منها قفشتين علشان تسوي منها الصلصة بعدين

الصلصة تكون سائلة بس لما تحط لها خلطة الطحين شوي تخثر

تصدق ... ودي ايي بيتكم أسويها عنك
يا خوفي لا تعفس الدنيا

ARTFUL يقول...

دواج عندي يا ميلو لا أصيدج

p;


خل اقولج ملاحظتي!!

الحين اول ما حمرته طلع شزينه متى المصيبة لما حطيته وخطيت على قفشتين خلطه وماي وخليته يطبخ !!!!

هني طلع ماي اللحم وبينت ريحته حيييل وبعدين حطينا الطحين وكملت السالفه

لا من اللحم ولا الصلصه!!

يا ما افهم يا انتي ما تعرفين تطبخين!!!

p;

المره اليايه بس بحمره وبشوفلي صلصله من بره


على العموم مشكوره

وحلفت عليج اطبخها بعرس واذا معرسه بعرس بنتج
p;

mellow يقول...

آرتفل

"ا ما افهم يا انتي ما تعرفين تطبخين!!!"


لوووول إنت تفهم بس ما تعرف تطبخ

:q

ما أقدر أعرف وين الغلط إلا لما اشوف ..لو مصور نفسك فيديو

مرة ثانية لا بغيت تطبخ قول لي أييكم البيت ..علشان أطبخ عنك

الطباخ يبيله نفس (إحم إحم)

هاردلك

ARTFUL يقول...

طالع تقول يبيله نفس!!!

انا عندي نفس ماشالله لا اله الا الله

أحسن واحد اسوي شكشوكه

p;


مره تصيب ومره تخيب

----

ما كسر خاطري الا مرتي الفقيره ، كان صاكها اليوع !!! وانا عفست الدنيا


لي يومج أدعيلج

p;

mellow يقول...

آرتفل

و يوم شكشوكتك مرة تصيب و مرة تخيب ليش ما طلبت من ماكدونلدز إحتياط؟

"لي يومج أدعيلج"

مشكور ... جزاك الله خير

:)))

flaanh يقول...

تعجبني نايجيلا بشكل رهييب ..

واايد اتابعها ..

بس وصفاتها ما تضبط معاي ماعرف ليش ..؟

الله يعطيج العافية ..

mellow يقول...

فلانة

هلا والله ، الله يعافيج

يمكن تضبط معاج بس النتيجة ما تعجبج
مهما كان الناس أذواق مو كلنا تعجبنا نفس المذاقات :)

شكراً على المرور

دنيا رواياتي https://rewaeate.blogspot.com يقول...

يسلم ايدك شي بشهي