الخميس، 19 نوفمبر، 2009

كيكة التشوكليت مع البينت بتر ...أول محاولة جادة في تزيين الكيك



مطبخنا بيمشي من عدة الطبخ إلي أشتريهم ، لدرجة إني ما قمت ألقى لي مكان بالمطبخ أحط فيه أغراضي ، صرت أدعس بكل مكان ، حتى دار الإستقبال ما سلمت ...الناس يردون من السفر معاهم سيفونيرات ، هدوم يديدة ، جناط ، مكياج ، طبعاً آنا مو مقصرة بكل هالأشياء بس هم فوقهم أرد بكتب طبخ ، قوالب تارت ، بهارات ،عدة طبخ ... كلهم استخدمتهم إلا عدة تزيين الكيك.


كله أتخيل نفسي أقعد بالساعات أزين كيك و أرسم عليها و ألصق و أقصص ... بس أتخيل ، ولا مرة تجرأت ، مالي خلق أقعد أبربس و بالأخير يطلع شكل الكيكة "كوارثي". عاد ذاك اليوم فجيت اليرارة و قعدت أطالع الفوندان و المزربان و السباتيولاز و أقول لي متى يعني؟


لما آخذ دورة بتزيين الكيك ...في دورة حاطين إسمي على الويتنغ لست و احتمال بيلغونها و في دورة مع بداية السنة اليديدة ... الله بنطر لين شهر واحد؟ بيحزر الفوندان!! إذا على التعليم يوتيوب ما يقصر كل شي فيه...و الحمدلله الله هداني :)



اليوم الأول : making the cake (المقادير في آخر البوست)




قمة الإحباط لما الواحد يشوف كيكة مزينة و شكلها يهبل و عقب ما يقصها و يعفسها تطلع إستغفرالله باصجة و مالها طعم ...الكيكة لازم تكون لذيذة علشان إذا الشكل ما نجح على الأقل بالأخير تنوكل .. إخترت إنها تكون تشوكليت و الفروستينغ من الـpeanutbutter ، أحب الملوحة إلي يعطيها السبال للحلويات ، طبعاً تقدرون تستخدمون خليط الكيك الجاهز من بيتي كروكر أو بيلسبيري أو روبن هود ..إلخ بس لأني أحب الشقى ..سويت الكيكة بنفسي ..


و بما أنها تجربة إستخدمت قالب وايد صغير ، 6 إنش (قمت أعرف بالإنشات).







سوينا الكيك و إنتفخ ، طبعاً لازم نقص الجزء المرتفع من الكيكة ، و نشرب الكيكتين بالتشوكليت سيرب (هيرشي) و نخليها تبرد بدرجة حرارة الغرفة (الكيكة لازم تكون باردة قبل لا نحط عليها الكريمة)






نحشي الكيكة بالفروستينغ إلي سويناه و نحرص إن الجزء الثاني من الكيكة إلي بينحط فوق يكون صوب الناعم مو المقصوص..طبعاً لين مني ممكن تصبون فوقها كاكاو سايح او تحطون فروستينغ زيادة من فوق بس لأني بزين الكيكة فلازم تتغطى كلها

التغطية ما طلعت ناعمة بس في طريقة ممكن تخلي شكل التغطية أنعم




إن نغطي الكيكة بورق مشمع (أو حتى كلينيكس المطبخ المتين) و نمسح بإيدنا على سطح و حواف الكيكة و يكون المسح باتجاه واحد (تخيلوا نفسكم إنكم قاعدين تضربونها أوتي) و لما نشيل الورق أو الكلينكس نشيلهم بنفس إتجاه المسح مو العكس.

هذا ليلحين أنعم سطح كيكة سويته. نحط الكيكة بالثلاجة و نكمل اليوم إلي وراه.


اليوم الثاني : التزيين


المفروض إن قبل لا أبتدي أغطي الكيكة بالفوندان ، أو حتي بالأصل قبل لا أسوي الكيكة ، المفروض إني أسوي الزينة (الورود) بس لأن آنا ما عندي غير علبة فوندان وحدة فما أدري إذا بتكفي حق تغطية الكيكة ولا لأ خليت تشكيل الورد بالأخير إذا بقى شي من عجينة الفوندان.

الفوندان لازم نعجنه بإيدنا لما يلين ، يكون عندنا سطح نظيف نرش عليه سكر بودرة كخطوة تمهيدية علشان نرق الفوندان ، الفوندان لما نرقه نخليه أكبر من حجم الكيكة بوايد


علشان نشيله نلفه على الـrolling pin لين النص و نفرشه على الكيكة و نبتدي نلم العجينة حوالين الكيكة و نمسح بإيدنا على السطح و الحواف علشان ما يصير شكل الفوندان مجعد و علشان يلصق الفوندان بالفروستينغ عدل.



نقص الزايد بقطاعة البيتزا



تمت المهمة بحمد الله ..تغطية الكيكة بالفوندان كانت أكثر خطوة خايفة منها ، طلعت من تحت شوي متنتفة و أماكن ثانية شوي متشقق بس راح يتغطى إن شاء الله...عموماً النتيجة كأول محاولة كانت ممتازة.
الحمدلله إن الفوندان زاد منه علشان اسوي الورد ...نرد نعجن الفوندان و بعدين نرقه ، و نستخدم قطاعات على شكل ورود



كيوت :)


الورد أبي يكون شكله مقوس مو flat لأن الكيكة كلها راح تكون أبيض بأبيض فلازم الزينة تكون بارزة ، التقويس يبيله عدة و قوالب معينة مو موجودة عندي ، بس في طريقة حلوة تعلمتها من النت ، إن ناخذ كلينكس و نسفطه بهالشكل





بعدين نربط الطرفين علشام يتكون لنا شكل حلقة و نحط الورد داخله لما ينشف و ياخذ الشكل



المادة اللاصقة إهيا الرويال آيسينغ royal icing وهو عبارة عن بياض بيضة + كوب و نص سكر بودرة + قفشة صغيرة عصير ليمون أول شي نجرخ (نخفق) بياض البيض شوية مو وايد بعدين نضيف السكر قفشة قفشة للبياض مع الإستمرار بالخفق السريع لما يتكون عندنا مزيج يشبه الكريمة لونه أبيض لامع مثل اللولو ، بعدين نضيف له الليمون ونخلط بالقفشة




نزهب جيس التزيين حق الـpiping و نختار الراس إلي فيه أصغر فتحة و نركبه على الجيس


علشان نملا الجيس بالكريمة (أو بالرويال آيسينغ) لازم أحد يمسك لنا الجيس و يفتح لنا إياه ...إذا ما في أحد يساعدكم ييبوا قلاص طويل و حطوا الجيس داخلة بهالطريقة و نمليه بالوريال آيسينغ





صار الجيس زاهب



الرويال آيسينغ راح نلصق فيه الورد على الكيكة و نرسم فيه الدوائر داخل كل وردة ، ما راعيت الترتيب و آنا أحط الورد خليت شكله طبيعي ، و على السطح خلطت بين أحجام الورود صغيرة و كبيرة و متوسطة


صار عندنا زحمة ورد


و نرسم بالرويال آيسينغ خطوط متعرجة على الحواف منها للتزيين و منها علشان نغطي الشقوق ، و إلي بقى من الفوندان نسوي منه دوائر صغيرة نصفها على الحاشية من تحت مثل عقد اللولو و تنلص بالرويال آيسينغ بعد



خلصنا :))

الشغل أسهل مما توقعت و كان متعة ما بعدها متعة

مقادير الكيكة

المكونات الجافة : كوب و نص طحين ، كوب سكر ، ثلث كوب كاكاو بودرة ، ملعقة صغيرة بيكربونات الصودا ، رشة ملح
المكونات السائلة : بيضتين ، 3 ملاعق صغيرة فانيليا سائلة ، علبة ساور كريم ، ملعقة صغيرة خل أبيض ، نص كوب حليب
الطريقة :
- نخلط المكونات الجافة على حدا و المكونات السائلة على حدا
- نصيف خليط المكونات الجافة إلى خليط المكونات السائلة
-نصب الخليط الناتج في قوالب الكيك (القوالب يجب أن تكون مدهونة جيداً بالزيت و مغطاة بالطحين) و ندخلهم في فرن درجة حرارته 150 لمدة ساعة أو إلى يستوي الكيك.
-نخرج الكيك من الفرن و نتركه يبرد داخل القالب لمدة خمس دقائق ثم نخرجه من القوالب و نتركه إلي أن يبرد تماماً بدرجة حرارة الغرف قبل أن نضع الفروستينغ.

مقادير الـpeanutbutter frosting: ( علبة بينت بتر حجم 500 غرام - نص قالب زبدة لينة - كوبين و نص سكر بودرة- حليب حسب الحاجة
-نخلط السكر + الزبدة إلى أن يتكون لدينا عجينة مفتتة
-نضيف البينت بتر إلي الخليط السابق و نخفق الجميع بالمضرب الكهربائي
- إذا كان الخليط جامد نضيف له القليل من الحليب حتى يلين
- يستخدم الخليط لحشو الكيكة أو تغطيتها.

تصوير : mellow

هناك 38 تعليقًا:

:: بـوح الصمـت :: يقول...

واااااااي إنتي زووووغة إسم الله عليج .. سنع ومنع :)

الله يحفظج ويحرّم إيدياتج عن النار يـارب .. بصرآحة ما قريت شي بس شفت الصور لإن حددي مشغولة ..

كالعادة عندي إمتحانين لوول ;q !

وهذي ;****
على راسج .. أحسّج تعبتي فيها !

الله يعطيج العافية ويطعمج من ثمار الجنّة يـارب :)

يا بخت أهلج فيج :)

libyea يقول...

الصراحة تسلم ايديك...النتيجة حلوة جداً " مش بالنسبة لأول محاولة" بس فعلاً شكل الكيكة طلع مرتب وحلو

على فكرة أنا متابعة لمدونتك من فترة طويلة...بس اليوم انتبهت إني ما عمري حطيت ولا تعليق على مواضيعك الحلوة :|

أنا متشجعة شوية نجرب هالكيكة...بس مزال مش متأكدة من قدراتي المطبخية..بصراحة جربت من عندك حلوى الورد..طبعاً طلعت عيني على ما كملتها...بس النتيجة طلعت حلوة على الآخر..وعشان هكي تشوفيني مترددة في التجربة LOL

bhr.qadsaweya يقول...

النتيجة رووعة
وتزيينج تزيين وحده بروفيشينال

تسلم ايديج .. واستمري
تقبلي مروري الأول

يعطيج العافية

Sn3a يقول...

تعلمتي السايزات بعد ماتوهقت بالرد فالفلت ;p

بصراحه
الشكل وااايد حلو
ماشاءالله
واهم شي نطرتي ثاني يوم
انا لما اسوي شي اسكن بالمطبخ لين يخلص ويا لابتوبي;p

mellow يقول...

بوحة
حبيبتي بعد عمري مشكورة على الدعوات الحلوة (ولك مثل أجرها يارب) كل هذا علشان سويت كيكة أصغر من جف الإيد؟
عيل مرة ثانية بسوي خروف محشي (بمناسبة العيد) :))

مو إلا تقرين البوست كفاية الكتب إلي تقرينها...الله يوفقج و إيسر لج أمورج


و هذي :***** على خشمج :)

mellow يقول...

ليبيا :))

"أسعدني مرورج" ..هذي الجملة دايماً أحطها بآخر ردودي على التعليقات لكن إنتي فعلاً أسعدني مرورج كونج من بلد شوي بعيد حسستيني إني صرت مشهورة ;)

زرت مدونتج و سعدت جداً بتجربتج لحلوى الورد ، شكلها طلع احلى من إلي آناسويته ، أشكرج جداً جداً على إشارتج لمدونتي في البوست إلي كنتي كاتبته.

حاولي تسوين كيكة و تزينينها و ما في داعي الخوف من الفشل (أتمنى لو إنج تشوفين إخفاقاتي في المطبخ ...لا تعد ولا تحصى)

حبيبتي أشكرج جداً على تعليقج و مرة ثانية أسعدني مرورج :))

mellow يقول...

البحرينية القدساوية :)))

يسعدني جداً إني أشوف تعليقات من برة الكويت ...اشكركم لأنكم عرفتوني بوجودكم ، لأني أشوف أعداد تدخل المدونة بس ما أدري منو إلي يدخل :)

حبيبتي مشكورة على تشجيعج و مرورج للمدونة...إن شاء الله إذا الله كتب و خذيت دورة التزيين (إدعوا لي) و صار شغلي صج بروفيشينال راح أحط الخبرات إلي تعلمتها في هذي المدونة بحيث تكون في متناول الجميع.

شكراً جزيلاً :*

mellow يقول...

سنعة

شفتي شلوووووووون ;qd
لا ألحين أعجبج صرت أعرف عدل بالسايزات :))

شغل بيوم واحد و اللهطة و هدة الحيل ما أكرره إنقرصت عقب ذيج المرة ، إذا بسوي شي بدلل نفسي على الآخر

مشكورة حبيبتي على التشجيع ...شكلي كله بسوي كيك المرات الياية :))

nosa يقول...

this is truly joy in a dish!

teslam yadech :D

matwq3t ena the cover is ready just so easy to make!!

نون النساء يقول...

تبارك الرحمن


والله حلوة مقارنة انها أول مرة
شكلها حلووو وااايد



انا يعت ههههههههههههههه
لأني صايمه
اذا فطرت الحين انتي بتستاثمين فيني


:P~

flaanh يقول...

روووووعة ..

صدق صدق شغل روعة ..

احب التزيين بس اتكاسل لاني احسه ياخذ وقت اكثر من وقت تسوين الكيكة...

بجربها بس عقب العيد ..الحينه ماشي وقت ... يسلموو عزيزتي ..

ويعطيج العافية ..

Sweet Revenge يقول...

واو عجيبة "ماشاء الله لا اله الا الله "خياليه وتقولين ما اعرف ازين
طبعا اوعدج اوعدج عقب 3000 سنة بحاااااول اسوي شي جذي
تسلم الايادي علي هالشغل الحلو
بس قولي لي "طبعا انا وين والناس وين"
وين مسوية منكيرج ,وايدج مو طويلة مثل ما بعض الناس قاعدة تروج
:**
صباحج شوكلت كيك :**

mellow يقول...

نوسا :)

صباح الخير ..الله يعافيج حبيبتي و بالفعل
I had a great fun doing it
حسافة بس كنت شارية علبة فوندان وحدة، عاد قاعدة أدور على أحسن ريسيبي علشان أسويه في البيت ...أو إني أطلبه من النت ...وصج الشغل بالفوندان وايد وايد سهل و يونس :)

mellow يقول...

نون النسوة

هاااااااااا بشري عسى كملتي صيامج :)عاد كل شي ولا أستاثم

تقبل الله طاعتج و زين ما سويتي الصيام هالأيام فضيل و سهل ..الجو يهبل و مسرع ما يطير الوقت.

مشكورة حبيبتي ..عاد آنا ما ذقتها بس إلي كلوها وايد مدحوها لي و يت لي مكالمات شكر :) مرة ثانية بسويها حقي بروحي:)

mellow يقول...

فلانه

هلا والله هلاوييين :)

مشكورة حبيبتي...عيونج الحلوين :) بالفعل الواحد ساعات يتكاسل عقب ما يتعب بالطبخ إنه يزين بس تصدقين يستاهل التعب لأن الطبق المزين يلفت الأنظار له و تلقين الناس بسرعة يتجهون له و ياما قعدنا ساعات في المطبخ و بالأخير محد ياكل شي .
بس إلي ريحني إن شغل الكيكة خذا مني يومين و ما سويته كله بيوم واحد

ARTFUL يقول...

الوول بيبر خطيييير

p;

mellow يقول...

سوييتييييي

حيا الله سويتي ...عاد عقب 3000 سنة!!!
استنسخي نفسج و حطي نسختج بالفريزر و نشوف ;)

تسلمين حبيبتي من ذوقج :***

مو مسوية منيكير ...محرمة عشتو و نسيت لا أسوي منيكير قبل ذي الحجة.. وه وه سكتي بس ...بحاااالة كل شي عندي بيخرب إحرامي ...وفوق هذا كله أنسى و أعضض أظافري، بس أنطر العيد متى إيي.
بس والله زين إذا شكلهم مبين جنهم مسويين
:))

mellow يقول...

ياااااا دي إلي يتحرشووون
سيييييدة على الوول بيبر و آنا قاعدة يومين مجابلة الكيكة؟

شلون الكيكة؟

om comment kuwait يقول...

هذا فن مو طبخ بس ماشاء الله

ودي اوصل هالمرحلة :)



يعطيج الف عافية و تسلم الايادي

ARTFUL يقول...

الكيكه

اي كيكه!!!

حسبالي بتراوينا مواعينج!!!

لا الكيكه حلوه ماشالله

p;

اللولو المنثور يقول...

الللللللللللللللللللللللله!!!

هذي ماتناكل هذي بس بقعد اشووفها
تجنن تجنن!!
ما شاء الله

الله يحفظج ،، ويعطيج الف الف عافيه،، جد شكلها مغري // ولذيذه أكيد

chandal/danchal!! يقول...

ما شاءالله ميلو... شي شي... شكل ومضمون... بس اجرااااام... تشوكليت و بينت بتر... سعادة لمدة شهر



تصدقين اني عيزت من الخطوات... يعطيج العافية وعقبال ما تسوين بزنس وتتحفينا باطباقك

:)

mellow يقول...

أم كومنت كويت

صج حسيت جني بحصة تربية فنية و آنا قاعدة اسويها :q

إن شاء الله توصلين إذا عندج الرغبة و حابة هالشي بإذن الله توصلين له ...لأنه سهل بصراحة بس يبيله خلق :)

مشكورة حبيبتي

mellow يقول...

آرتفل

لاااااا.. تصدق آنا كان قصدي اوريكم الكيكة !!!

:qd

مشكور من ذوقك

mellow يقول...

اللولو المنثور


مشكووووووورة بعد عمري عيونج الحلوين

طرشتها بيت خالتي...تصدقين هياهم قلبهم و كلوها؟!! آنا أحس لو كنت موجودة جان ماخليتهم يقصونها :))

ما ذقتها بس وايد اعجبتهم :)

mellow يقول...

جندووووووولاااااا

لووووووول ضحكت على سعادة لمدة شهر
واي صاجة يا حلو الحارج لا صار من هالنوع :))

بعد عمري نزلناج وايد دريـّـات ، أحط لج زحلاقية خاصة بالمدونة :q ...ياربي بوستاتي هالأيام كل ماله و تطول ...بخليها فيلم صامت مرة ثانية بس صور

مشكورة حبيبتي من ذوقج :**

صبا يقول...

اسم الله عليج عسى الله يحفظج

الصور اتينن والكيكه اتشوق
اكيد لذيذه
تسلم الايادي على هالكيكه السنعه والبوست الحلو الي يفتح النفس
:***

يا بخت لي ياخذج شكله من اول شهر ماراح يطلع من الباب اسم الله عليه
عكسي طبعا من الضعف بيعاني من انيميا حاده ويمكن يموت من اليوووع
؛)

mellow يقول...

صبصب؟!!
أهليييييين شخبارج :)))

وييييين غطيتي ...يالله have a piece of cake
:)

"يا بخت لي ياخذج شكله من اول شهر ماراح يطلع من الباب اسم الله عليه"

لوووووووول إذا لهالدرجة عنده قابلية للسمنة ما أبيه :)

مشكورة حبيبتي تسلمين من ذوقج :**

فــــــرنـــــــاس يقول...

كل عام وأنت ومن تحبين بخير

فرناس

coffee-42 يقول...

I'm one of your fans.. I like ur ideas alot
we need a new post as soon as u can
:)

ChuBBy-Doll يقول...

Yummy Yummy Yummmmmmmmm

Super Sara يقول...

واااو ماااشالله !
أول ما شفت الصورة اللي فوق كللش ما توقعت ان اهي اللي بتكون النتيجة النهائية ...

ماشالله شغلج لا يعلى عليه
تسلم الأيادي :)

:

Hope يقول...

واااااو
صج صج روعه.. شغل Pro
ما شاء الله عليج فنانه، تبارك الرحمن
تسلم ايدج يا رب و يعطيج العافيه

bent el deera يقول...

ميلوو وينج حبيبتي مكانج شكبره :**

Ļa ƒéммé يقول...

إبداع لا إله إلا الله وحالي من حالج دايم اتعلم من اليو تيوب وبالنسبه لعجيبنه الفوندان الجاهزه من وين اخذتيها من فضلج .. وعندي
استفســ2ـارين ياليت اتفيديني من خبرتج ...

1- ماسبب وضح الطحين والزيت في قالب الكيك وسبق وسويتها جنه يصص ;\؟؟ واعتقد انه في سبريه يمنع التصاق الكيك هل جربتيه ؟؟

2- كله اتوهق بطريقه نقل الكيكه من الطبق اللي اخبزها فيه إلى طبق التقديم فهل استخدم ورق الزبده ولا شنو الطريقه وشكرا على الإفادة

NajaT يقول...

ماشاء الله تبارك الرحمن

الله يعطيج العافيه

انا اول مره ادش بس باذن الله بكون متابعه دائمه لج

Bionza يقول...

شلون تشتغلين و تلاقين وقت لكل هالابداع أنا بس بدخل مدونتك بجوع و بشتهي أدخل الكمبيوتر واكل شوي بتمنى انو زوجي ما يدخل مدونتك بيصير بدو ينتحر على كل الاكل المحروق اللي ما بعرف أعمل غيرو

Carissa Layton يقول...

أريد أن أشارك شهادة من حياتي إلى كل واحد. أنا تزوجت من زوجي ، وأنا أحبه كثيرا و كنا متزوجين لمدة 5 سنوات حتى الآن مع اثنين من الاطفال . عندما ذهب لقضاء عطلة في فرنسا كان يقصد سيدة الذين encharm له مع جمالها ، وقال لي انه لم يعد مهتما في الزواج أكثر من ذلك. لقد كان ذلك الخلط والسعي للحصول على مساعدة ، وأنا لا أعرف ماذا أفعل حتى شكوت لصديقي و أخبرها عن مشكلتي. قالت لي لا داعي للقلق حول هذا الموضوع أن لديها مشكلة مماثلة قبل و يعرفني على رجل يدعى الدكتور Saibaba . الذي يلقي ظلالا على زوجها السابق و اعادته لها بعد 2DAYS . وقالت انها تطلب مني أن اتصل الدكتور Saibaba . أنا اتصلت به لمساعدتي في اعادة زوجي وانه لا تسألني ما يدعو للقلق أن آلهة له الصدارة الآباء سيقاتل بالنسبة لي. قال لي قبل يومين انه سوف إعادة توحيد لي وزوجي معا. بعد يومين دعا زوجي و قال لي انه يعود الى سعى الأمور معي، و كان مفاجأة عندما رأيته و بدأ البكاء الصفح وأنه لم يعرف ما جاء الله عليه وسلم أنه لن تترك لي مرة أخرى أو الأطفال. الحق الآن أنا أسعد امرأة على وجه الأرض ل ما هذا الإملائي عجلة كبيرة لم بالنسبة لي وزوجي ، يمكنك الاتصال الدكتور Saibaba على أي مشكلة ، وقال انه هو لطيف جدا ، وهنا هو اتصالاته templesaibaba@yahoo.com